Gaur bi urte zendu zen, bere jaioterrian, Presen Zubillaga Auza Iruñeko militante feminista, irakaslea eta komunista, 72 urterekin. Bere militantzian Zabaldi elkartasun etxea eta Emakume Internazionalistaren sorreran parte hartu zuen. Gainera, Iruñeko Udal Ikastolako irakaslea izan zen eta 78ko Sanferminak plataformako kidea izan zen.

LKI Liga Komunista Iraultzailean hasi zuen bere militantzia, 1970eko hamarkadan, eta bereziki 78ko Sanferminak plataformako bultzatzaileetako bat izateagatik ezaguna izan zen. Honekin batera, memoria historikoa berreskuratzeko hainbat ekitalditan parte hartu zuen. Bereziki Martin Villa prozesatzeko eskaria izan zen Zubillagaren aldarrietako bat.

«Prozesamenduak indartuko luke diktaduraren itxiera faltsua eta trantsizioa zalantzan jartzea, testu liburuetan utzi nahi duten bezala behintzat», adierazi zuen Presen Zubillagak, horren harira.

Feminismoari dagokionez, Zubillagak defendatzen zuenez patriarkatuaren aurka egiteaz gain, kapitalismoa eta politika arrazistak aurpegiratu behar dira ere bai. Berak esan zuenez, «feminismoa ez doa gizonen aurka; kontua ez da haiek beren rola txikitzea, emakumeak zapaltzeari uztea baizik».