«Laudioko Udaleko Gobernantza Feministako zerbitzuak emakumeen eta gizonen arteko berdintasuna sustatzeko jarduera garatzen duten irabazi-asmorik gabeko erakunde eta elkarteei zuzendutako lehia askeko dirulaguntzak abiarazi ditu», jakitera eman du gaur udal Gobernuak.

Izan ere, gaur bertan zabaldu du eskariak aurkezteko epea. Irailaren 24ra arte izango dute aukera laudioarrek proposamenak aurkezteko.

Laguntzak irabazi-asmorik gabeko erakunde eta elkarteentzat dira, «programak edota jarduerak antolatu, bideratu eta gauzatu ditzaten». Materialak, joan-etorriak, edukiak zabaltzeko ekimenak edota aditu edo irakasleen kontratazioa finantzatzeko laguntzak dira, baita jarduerarekin lotutako beste kostuei aurre egiteko ere.

Udal iturriek ohartarazi dute, era berean, ez direla ordainduko «eskatzaileen dietak, opariak, ordezkaritza-gastuak edo jende guztiarentzat irisgarriak ez diren ekintzak».

Ereduak, tramitazioa errazteko

Aipatutako laguntzak Laudion egoitza edota jarduera duten eta berdintasunaren arloan «esperientzia, helburu edo prestakuntza egiaztatzen duten elkarteei» zuzenduta daude. 

Informazio guztia eskuragarri dago Laudioko Udalaren webgunean, baita Gobernantza Feministako zerbitzuan ere, eta eskariak Udalaren egoitza elektronikoaren bidez izapidetu daitezkeela azaldu dute.

Aurten, gainera, berrikuntza gisa prestatutako ereduak aurkituko dituzte elkarteek eskabidearekin batera aurkezteko, tramiteak errazteko asmoz.