Diskurtso negazionisten aurreko begirada kritikoa landuko du Treba Nerabeak programak Irunen

Begirada kritikoa izango da Treba Nerabeak programak ekianean zehar Irunen landuko duen bloke tematikoa. 12 eta 16 urte bitarteko nerabeei zuzenduta, diskurtso ukatzaileen aurreko irakurketa kritikoa eta gazteriaren aktibismo komunitarioa jorratuko dituzte.

Gipuzkoako Foru Aldundiko Gazteria Zuzendaritzak bultzatzen du Treba Nerabeak programa, 12 eta 16 urte bitarteko nerabeei zuzendua dago, eta hilabete honetan zehar begirada kritikoaren bloke tematikoa garatuko du Irunen. Partaidetza-metodologien bidez, diskurtso ukatzaileak eta gazteria aktibismo komunitarioan inplikatzea izango dira jorratuko diren bi gaiak.

Isaac Palencia Gazteria zuzendariak azpimarratu du oso garrantzitsua dela eduki mota horiek lurraldeko gazteei hurbiltzea, «formatu erakargarri batean, inguruan dituzten zailtasunei buruz hausnartzeko orduan parte hartze aktiboa izan dezaten».

Bestalde, Sandra Caballerok, Irungo Udaleko Hezkuntza eta Gazteria ordezkariak, nabarmendu du «diskurtso ukatzaile hain kaltegarriak bezalako gaiak jorratu ahal izatea funtsezko estrategia» dela «gazteen kolektiboa, kasu honetan gure hirikoa, begirada kritiko eta kontzienteagoarekin prestatu ahal izateko».

Treba Nerabeak ikastaroetako izen-emateak gaztelekuen bidez kudeatzen dira. Lehen ikastaroa, ‘Begirada kritikoa eta diskurtso negazionistak’, datorren larunbatean izango da.

Parte hartzeko metodologien bidez, «diskurtso horiei lotutako emozioak, haien eragin soziala eta horiei aurre egiteko estrategiak aztertuko dira, aztertzeko gaitasuna indartzeko eta errespetuan eta inklusioan oinarritutako narratiba alternatiboak eraikitzeko», azaldu dute Aldunditik.

Hilaren 14an, halaber, ‘Mirada critica: scape box’ lana eskainiko dute. Gorroto-diskurtsoetan sakonduko da, eta diskurtso horiei aurre egiteko ekintza sustatuko da, enpatiaren eta pentsamendu kritikoaren bidez, diskriminazioaren alternatiba gisa.

‘Scape Box-No lo Niegues’ jokoaren bidez, desinformazioari eta gorroto-diskurtsoei aurre egiteko narratiba berriak eraikitzeko eta ikertzeko taldeetan lan egin nahi da, aktibismo komunitarioa sustatzeari begira.