Natura Ondarearen eta Biodibertsitatearen Behatokia sortuko du Arabako Foru Aldundiak

Natura Ondarearen eta Biodibertsitatearen Behatokia sortzeko lehen urratsak egin ditu Arabako Foru Aldundiak. Klima aldaketak ekosistemetan eta biodibertsitatean eragiten duen inpaktua ezagutu eta informazio «fidagarria eta eguneratua» izatea ditu helburu, baita ekintzen inbentarioa egin ere.

Arabako Foru Gobernuaren Kontseiluak Arabako Natura Ondarearen eta Biodibertsitatearen Behatokia sortuko du, eta horreratzeko, oniritzia eman dio euskarri teknikoa izango den Laguntza Teknikoko Zerbitzu bat kontratatzeari. Zerbitzu horrek 269.709 euroko aurrekontua izango du, BEZa barne, eta hiru urteko egikaritze-epea, beste bi urtez luza daitekeena eta bost urteko gehieneko epea gainditu gabe.

Aldundiak ohar baten bidez jakinarazi duenez, Behatokia Lurraldeko natura-ondarearen erreferentziazko figura integratzailea da, eta herritarrei biodibertsitatearen eta natura-ondarearen kontserbazioaren arloan garatu beharreko egungo eta etorkizuneko ekintzen inbentarioari buruzko informazio eguneratua ematen die.

«Naturaren egoera eta klima aldaketak Arabako ekosistemetan eta biodibertsitatean eragiten duen inpaktua ezagutzea funtsezkoa da kontserbazio eta babes egoera zehazteko, lurraldearen %28 babestuta baitago», gaineratu du.

Horretarako, foru erakundeak natura ondarea zaintzera bideratutako neurriak hartzearen alde egin du, bai eta erabakiak hartzen lagunduko duen informazio osoa, fidagarria eta eguneratua izatearen alde ere. Testuinguru horretan, zehaztu du Natura Ondarearen eta Biodibertsitatearen Behatokia ezartzeko Foru Gobernuaren Kontseiluak astearte honetan onartutako akordioa mugatzen dela.

Arabak babes maila desberdineko azalera du, eta horien artean nabarmentzekoak dira ‘Natura 2000’ Europako Sare Ekologikoan sartutako espazioak, 25 Kontserbazio Bereziko Eremu eta Hegaztientzako Babes Bereziko 4 Eremu, EAEko ‘Natura 2000 Sarearen’ erdia hartzen dutenak. Era berean, Arabako azalera osoaren %57k ‘Paisaia bikaina edo berezia’ kalifikazioa du.