Dronak erabiltzen hasi dira Everesteko zaborra garbitzeko

Airlift Technology enpresa dron astunak erabiltzen hasi da Everesteko lehen kanpamendutik kanpamendu nagusira zaborra jeisteko. Azken urteetan mendian eman den masifikazioa dela eta, zaborra pilatu da bertan, eta altuera dela eta, zaila da jeistea.

Everest mendia ere masifikazioa jasaten ari da duela urte batzuk. Hori dela eta, arazoak sortzen ari dira zaborrarekin, bertan pilatu egiten delako.  Arazo horri aurre egiteko asmoz, sistema berri bat jarri dute martxan, dronen bidez, pixkanaka, zaborra jeisten duena. Orain arte erabiltzen ziren sistemak baino merkeagoa eta eraginkorragoa da dronak erabiltzea. 

Helikopteroz edo giza indarrarekin besterik ezin zen zaborra jeitsi, baina orain aparailu batek 10 minututan 10 pertsonek 6 ordutan garraiatu dezaketen zaborra eraman dezake. DJI FC 30 dronak 6.065 metrotara dagoen lehen Kanpamendutik hartzen du zaborra eta kanpamendu nagusian uzten du, eta bertatik mugitzea jada errazagoa da. Aurtengo denboraldian, apirila eta ekaina bitartean, 300 kilo zabor jeitsi dituzte «munduaren gailurretik».

«Dronak ez dira gerran bakarrik erabiltzen, bizitzak salbatzeko eta ingurumena babesteko ere erabiltzen dira. Dronen teknologia etorkizun gisa ikusi behar dugu, klima eta ingurumenaren ikuspegitik eta alderdi humanitariotik. Honek dena aldatuko du», aipatu du Airlift Technology enpresako CEO den Raj Bikram Maharjanek.

Iaz Ama Dablam mendian egin zuten froga eta 641 kilo zabor kentzea lortu zuten. Arrakasta ikusita, orain Everesten hasi dira lanean. Baina zaborra kentzea ez da dron hauek egin dezaketen "lan zikin" bakarra. Izan ere, helburu nagusia zaborra garbitzea bazen ere, azkenean Sherpentzat lagungarriak izango dira. 

«Konponketa taldekoak pozik daude. Orain bidea konpontzera joaten direnean ez dituzte eskilarak, oxigeno botilak eta sokarik eraman behar; orain ezer gabe igo daitezke, eta dronek eramango diete behar dutena. Oso pozik daude horrek energia eta denbora asko aurrezten dielako», azaldu du 19 urteko Nima Rinji Sherpak, 14 zortzimilakoak igo dituen munduko mendizalerik gazteenak.