Arabako Foru Aldundiak 302.600 euro bideratu ditu ikus-entzunezko sorkuntzarako laguntzetara

Arabako Foru Aldundiak 302.600 euro bideratu ditu ikus-entzunezko sorkuntzara, eta guztira, 21 proiekturi lagundu dio 2025ean. Sektorearekin lotutako hainbat proiektu jarri dute martxan, herrialdea ikus-entzunezko erreferente bihurtzeko.

Arabako Foru Aldundiak 302.600 euro eman ditu, guztira, ikus-entzunezko sorkuntzarako dirulaguntzetan, 2025ean ikus-entzunezko 21 proiekturi laguntzeko. Lau modalitatetan banatu ditu laguntzak: ikus-entzunezko proiektuen garapena, plataforma digitalak eta telebista (102.600 euro), film luzeen eta dokumentalen ekoizpena (60.000 euro), film laburren ekoizpena (90.000 euro) eta gidoien idazketa (50.000 euro).

Saray Zarate Ekonomiaren Garapen eta Iraunkortasuneko diputatuak nabarmendu du dirulaguntzak %21 gehitu direla aurreko urtearekin alderatuta. Deialdiak euskarazko sorkuntza lehenesten du.

2018an abian jarri zenetik, laguntza horiek «Arabako DNA» duten 155 proiektu babestu dituzte guztira, eta 2 milioi euro inguruko inbertsioa metatu dute. Besteak beste, ‘Irati’, ‘Ane’, ‘20.000 erle-espezie’, ‘La pequeña Suiza’, ‘Cuerdas’ eta ‘Polvo Somos’ film luzeek eta laburrek jaso dute laguntza.

Ekimen ezberdinak martxan

Laguntzez gain, Foru Aldundia estrategia orokor bat ari da zabaltzen ikus-entzunezkoen sektorea lurraldearen dibertsifikazio ekonomikoaren zutabeetako bat izan dadin. Ekimenen artean Araba Film Commission nabarmentzen da, Udalarekin lankidetzan, filmaketak errazteko eta ekoizpenak erakartzeko.

Baita APIKArekin sinatutako hitzarmena ere, APIKA Audiovisual Project Lab bezalako proiektuak bultzatzen dituena, tokiko sortzaileentzako prestakuntza eta garapen gunea. Proiektu horrekin batera, beste sektore ekonomiko batzuek ikus-entzunezkoekin lan egin ahal izateko prestakuntza eta laguntza programa bat egingo da, eta horri Aiaraldeko Ikus-entzunezko Hub gehituko zaio. Erreferentziazko gune horrek laguntza logistikoa, aholkularitza eta zerbitzu teknikoak eskainiko ditu filmak, serieak eta dokumentalak filmatzeko.

Foru diputatuak adierazi duenez, helburua «talentua sortzea eta Araban ikus-entzunezko sektore indartsu bat sendotzea da, ekonomia dibertsifikatzen eta gure nortasun kulturala proiektatzen lagunduko duena».

Azpimarratu duenez, ikus-entzunezkoen sektorea Arabako egitura ekonomikoa dibertsifikatzeko esparruetako bat izango da. «Laguntza eta pizgarri fiskalek Araba Estatuko eta nazioarteko produkzio-etxeen mapan kokatu dute, lurraldean kokapenen, profesional kualifikatuen eta babes instituzionalaren konbinazio bakarra aurkitzen baitute", baloratu du.

«Ikus-entzunezko proiektu bat sortzea historia bat kontatzea baino askoz gehiago da; lurralde gisa garena ezagutarazteko modu bat da», azaldu du diputatuak, eta «Arabako ehun ekonomiko eta kulturala indartzen laguntzen duen eta goraka doan sektore batean kultura, sormena eta aukerak sortzeko» konpromisoa berretsi du.