Arabako Foru Aldundiak iragarri duenez, ‘Hub Audiovisual Araba’ ekimena abian jarriko du eta Aiaraldea eskualdea izango da ekimen horren epizentroa, «pizgarri fiskal berriei esker lurraldean filmatzeko gero eta interes handiagoa aprobetxatzeko eta Araba ikus-entzunezko industriarako erakarpen gune bihurtzeko».

Foru erakundeak azaldu du ohar batean, ‘hub’ berria ekoizleen, erakundeen eta sektoreko profesionalen topagune izango dela, laguntza logistikoa, aholkularitza eta zerbitzu teknikoak eskaintzeko, «filmen, telesailen, dokumentalen eta ikus-entzunezko beste formatu batzuen filmaketak errazteko».

Nabarmendu dutenez, proiektu honen helburua «ez da soilik Araba estatuko ikus-entzunezko mapan erreferente gisa kokatzea, baizik eta tokiko ekonomia dinamizatzea eta Aiaraldean eta lurralde osoan enplegu eta garapen aukerak sortzea».

Onartu berri diren pizgarri fiskalak nabarmentzeaz gain, Foru Gobernuak adierazi du Arabak ingurune natural anitza eskaintzen duela, ondare historikoa, komunikazio onak eta profesional kualifikatuen sare gero eta handiago bat, «filmaketa-plato gisa duten erakargarritasuna indartzen duten elementuak».

Azkenik, adierazi du ‘Hub Audiovisual Araba’ sortzea kultura eta sormen sektorea bultzatzeko estrategia zabalago baten parte dela, foru erakundeak sustatzen dituen garapen iraunkorreko eta berrikuntzako politikekin bat datorrena.