Igandean Bilbon jokatuko den Buruz Buruko Txapelketaren finalean Gorka Altuna eta Iker Iriarte izango dira botileroak, Gorka Jokin bere lehengusuarena, eta Iker lagun mina duen Iñaki Artolarena. Biak alegiarrak izanda, bertako Intxurre elkartean elkartu ditugu aste honetako alean.

Mapan begiratuta, Alegia eta Amezketa arteko errepideak 6,5 kilometro dituela ageri da. Buruz Buruko bi finalistak, beraz, zazpi kilometroren barruan jaioak dira, gutxi gorabehera. Baina finaleko protagonisten gertutasuna erakusten duen beste datu batzuk ere eman dizkigu Iker Iriartek.

«Jokin laguna dugu, Gorka zer esanik ez; laguna izateaz gain, bizilagunak ere izan gara urte askoan. Bertso eskolan nire ikaslea izan zen Gorka, Iñaki ere bai. Herri txikietan gertatzen diren gauzak. Aldi berean, gure aita Amezketakoa zen, nik Amezketako pilota eskolan jokatu nuen... Gauza asko elkartzen dira finala berezia egiten dutenak», iritzi dio Iriartek.

Eta botileroaren figuraz ere jardun gara. Printzipioz ez dira entrenatzaileak, ezta prestatzaile fisikoak edota psikologo ofizialak ere, baina argi dago arlo horietan guztietan bere ekarpentxoa egiten duela botileroak. Aipatu digutenez, pilotariekin duten konfiantza eta konplizitatea dira botilero izateko gako garrantzitsuena.