Goi mailako sei ikertzaile berri sartu dira Gipuzkoako I+G+B ekosisteman, Foru Aldundiaren 2024ko eta 2025eko deialdiei dagokien ‘Fellows Gipuzkoa’ laguntza programaren esparruan.
Aurreko astean, Unai Andueza Ekonomia Sustapeneko eta Proiektu Estrategikoetako foru diputatuak harrera egin zien ikertzaileoi Ikerbasquen, ikerketa zentroetako ordezkariekin batera, gidatzen dituzten proiektuak zehazkiago ezagutu ahal izateko.
Gipuzkoako Aldundiak 482.549 euro bideratu ditu ‘Fellows’ programara 2024an, eta 449.642,72 euro 2025ean. Ekimenaren helburua da doktoratu ondoko prestakuntza eta nazioarteko garrantzia duten taldeetan esperientzia duten ikertzaileak Gipuzkoako taldeetan sartzea, haien maila zientifikoa eta proiekzio globala handitzeko.
Programak bi jarduera ildo osagarri ditu: talentua erakartzea, Zientzia, Teknologia eta Berrikuntzaren Euskal Sarean integratutako Gipuzkoako zentroetan ikertzaileak sar daitezen erraztera bideratua, gaitasun zientifikoa eta nazioarteko proiekzioa sendotuz; eta talentua atxikitzea, zentro horiei hiru urtez profil horiek sendotzen laguntzera bideratua, herrialdeko I+G+B ekosisteman egonkortasuna eta jarraitutasuna bultzatuz.
Era berean, aste honetan bertan onartu da ‘Fellows’ programaren 2026ko deialdia, 480.000 euroko zuzkidurarekin, eta, horren bidez, foru erakundeak berretsi egin du programaren jarraitutasun eta sendotzearekiko duen konpromisoa.
Sei proiektu berri
Gipuzkoako I+G+B sarean sartu diren sei ikertzaile berrien proiektuei dagokienez, Maria Camarasa Gomez (MPC - Materials Physics Center) adimen artifizialeko dimentsiotasun txikiko sistemetan sortzen ari diren propietate optikoei buruzko proiektua garatzen ari da.
Niccolo Giaconik (CIC nanoGUNE), aldiz, nanogailuetan neurrira egindako karbonozko puntu kuantiko kiralek gaitutako espin bidezko argi polarizatuaren emisioan zentratutako proiektuan lan egiten.
Era berean, Umbertoluca Ranieri ikertzaileak (MPC - Materials Physics Center) trantsizio energetikorako dinamikoki desordenatuta dagoen materiaren kontrolari buruzko proiektu bat du esku artean, eta Daniel Baenak (BCBL) zahartzaroko loaren eta kognizioaren oszilazioen dinamika funtzionalei buruzko proiektu bat.
Azkenik, Elena Gabirondo (Polymat) karbonoa atzitzeko eta deskarbonizazio eraginkorrerako CO2arekiko sentikorrak diren mintz polimeriko «arnasgarriei» buruzko 'Respoly' proiektua garatzen ari da, eta Tamara Gomez Dacoba (CIC biomaGUNE) CAR-T zelulak sortzeko nanopartikulen azaleraren propietateak aldatzeari buruzko proiektu batean ari da lanean.
