Goiztiri diskoetxea Baionan jaio zen joan den mendeko 60ko hamarkadaren hasieran, Abeberri anaiek eta Ximun Haranek bultzatuta. Goiztiriren katalogoa aitzindaria izan zen Mixel Labegerieren lanak editatzen, eta Mikel Laboa eta Imanol Larzabal (“Michel Etxegaray” ezizenarekin) bezalako Hegoaldeko artistek ere babesleku bezala erabili zuten, zentsura frankistari iskin egiteko. 1966an, Mikel Laboak bere bigarren singlea argitaratu zuen Baionako zigiluarekin. Azaleko argazkia eta diseinua Mikel Forkadaren lana izan ziren. Forkada garai hartako euskal kulturaren abangoardiako pertsonaia giltzarria izan zen, eta, besteak beste, Jarrai antzerki konpainiako kidea izan zen, non eszenografia, zuzendaritza eta diseinu lanak egin zituen. Laboaren lagun pertsonala ikasle garaitik, Forkadak bere lehen hiru EPen karatulak diseinatu zituen, Goiztirik 1964 eta 1969 bitartean argitaratuak (“Azken”, “Urtsuako kanta” eta “Bertolt Brecht”). Sinpleak eta hurbilekoak, baina indar eta kontraste handikoak, Mikel Forkadaren zuri-beltzeko erretratuek Laboaren esentziarik garbiena harrapatzen dute. Diseinuan egindako lanaz gain, Mikel Forkada arte garaikidearen dinamizatzaile handia izan zen, 1968tik 1972ra Huts Galeria zuzendu baitzuen Donostian. Espazio horretatik abangoardiak sustatu zituen eta funtsezko erreferenteen erakusketak hartu zituen, hala nola Jose Luis Zumeta, Rafael Ruiz Balerdi, Jose Antonio Sistiaga, Remigio Mendiburu, Carlos Sanz, Carmelo Ortiz de Elgea, Menchu Gal, Marta Cardenas, Ricardo Ugarte edo Agustin Ibarrola. Bere ekarpena funtsezkoa izan zen frankismoaren zentsura garaian euskal kultura bultzatzeko.