Dolores Gonzalez Katarain ‘Yoyes’ Ordizian jaio zen, 1954ko maiatzaren 14an. 1978an ETAko zuzendaritza gorenera iritsi zen. Argalaren ondoan jardun zuen eta, gero, hura hil zutenean, bere lekukoa hartu zuen.

Garai hartan hainbat joera sortu ziren ETAren baitan, jarraitu beharreko bideari zegokionez eta Yoyesek ETAtik ateratzea erabaki zuen. 1980an Mexikora erbesteratu zen.

ETAko zuzendaritzak ez itzultzeko esan zion baina, 1984an, Parisera bidaiatu zuen eta errefuxiatu politiko bilakatu zen. 1985eko abuztuan itzuli zen Euskal Herrira eta ‘Cambio 16’ aldizkariak erreportaje zabala argitaratu zuen, ‘ETAkidearen itzulera’ izenburuarekin.

1986ko irailaren 10ean hil zuen ETAk Ordizian, herriko euskal jaietan, 3 urteko semearen aurrean. Beste senide batzuekin batera, atentatuaren unean traktoreen erakusketa bat bisitatzen ari zen. Hiru bala tiro jaso zituen.

DYAko kideek ETAko militante ohia artatu zuten lehen minutu horietan, baina ezin izan zuten ezer egin haren bizitza salbatzeko. Hurrengo egunean, Ordizian greba orokorra izan zen eta Yoyes hilobiratu baino lehenago ETAk bere gain hartu zuen hilketa.

Unai Lobok argitaratu berri duen ‘Los sonidos de mi vida’ (Desacorde Ediciones) liburuan jasotzen dira Angel Katarain, bere anaiaren, oroitzapenak.