1932ko apirilaren 19an, hainbat euskal komunikabidek Nafarroari buruzko beren berriak apirilaren 17ko gauean gertatutakoak kontatuz ireki zituzten. Gau hartan, Iruñeko Estafeta kalean "Juventud Jaimista"-ko kideek gazte bati egindako eraso baten ondoren, erasotzaileetako bat “Circulo Carlista”-n babestu zen. Inguruan zegoen jendeak, gertatutakoaren lekuko izanda, “Circulo Carlista”-ko kideei aurre egin zien haien egoitzan. “La Voz de Guipuzcoa” egunkari errepublikanoaren arabera, une horretan «gizon batek bost eta zazpi errebolber tiro artean egin zituen ezkerreko elementuen aurka “escaleras del Sordo” ingurutik». Ondorioz, bi gazte hil ziren, Saturnino Bandres eta Jose Luis Perez, 19 eta 21 urtekoak. Handik egun gutxira beste zaurituetako bat hil zen, Julian Velasco. Prentsak “Circulo Carlista”-ren itxierari eta barruan zeuden pertsonen atxiloketari buruzko informazioa eman zuen. Jasandako erasoei eta gazteen heriotza tragikoari erantzuteko, Iruñeko Langile Elkarteen Tokiko Federazioak 24 orduko greba orokorra antolatzea erabaki zuen, gazteen heriotza salatzeko eta gaitzesteko. Egile ezezaguneko irudi honetan, Guardia Zibilaren patruila bat ikusten da Iruñeko Gaztelu plazan, armaz josita eta jarrera erasokorrean. Argazkiak gazteen heriotza salatzeko egin zen greba egunean bizi izan zen errepresio giroa islatzen du.