35 urte bete dira Itoitzekin Solidarioek elkarteko zortzi kidek urtegiaren obren kontrako protesta ekintza burutu zutenetik. Protestak lortu zuen ikusgarritasun mediatikoagatik eta kable mozketak obren atzerapenean izan zuen eraginagatik, Euskal Herriko borroka ekologistan mugarri bihurtu zen ekintza hura. Hemen grabatu zen bideoaren irudiak.

1996ko apirilaren 6ko goizaldean, hilabeteetako prestaketa lanen ostean, buzo eta kaputxa zuriz jantzitako zortzi ekintzailek kazetariak sabotajearen lekuko izan ziren lekura gidatu zituzten. Kazetari batzuk zeuden bertan, ekintzaren lekukotasun fidagarria emateko asmoarekin.

Horien artean ‘Egin’ egunkarikoak zeuden eta bertatik bertara ikusi zuten nola neutralizatu zuten segurtasun-zaindaria eta nola kendu zioten arauzko pistola. Gero, obraren bihotzera jo zuten: kableetara. Zerra eskuan hartuta eta begiak betaurrekoekin babestuta, presa betetzeko asmoarekin egunero 4.200 metro kubiko hormigoi garraiatzeko erabiltzen ziren kableak moztu zituzten.

Protagonistek ezin hobeto gogoratzen dute xehetasun bakoitza, baita moztu zituzten kableen ezaugarri zehatzak ere. Altzairuzko sei kable-garabi espiral ziren, 6,25 cm-koak, 800 metroko luzera eta 140 tona arteko kargei eusten zietenak. 

Obrak geldiarazi zituzten, baina ez zuten urtegia gelditu. Dena den, borroka ekologistaren mugarri bihurtu zen berehala. Ekintza gauzatu zuten zortziei lau urte eta hamar hilabeteko espetxe zigorra ezarri zieten. Horretaz gain, isun ekonomikoa jasan zuten, eta horietako batzuek oraindik ere pairatzen dute kondena, euren kontuak enbargatuta daudelako.