Getxoko Udalak doako autobus zerbitzu bat jarriko du martxan uda honetan Ereagako hondartzara, irisgarritasuna eta hondartzarekiko lotura hobetzeko, igogailua modernizatzen duen bitartean.
Udalak ohar baten bidez jakinarazi duenez, autobus irisgarriak eta 20 minutuko maiztasunak izango ditu zerbitzuak. Algortako goiko aldea eta Areeta-Ereaga/Arriluze ingurua lotuko ditu, herritarrek egindako eskariei erantzunez.
Nabarmendu dute zerbitzu «erosoa eta irisgarria» eskainiko dutela, Ereagako igogailuan udazken-negurako aurreikusitako hobekuntzak egiten diren bitartean.
Zehaztu dute zerbitzua aldi baterako izango dela, gehienez hiru hilabeteko iraupenarekin, eta aurreikuspenen arabera, ekainetik aurrera jarri ahal izango da martxan, izapidetze-prozesua amaitu eta lizitazioa egin ondoren.
Doakoa izango da eta astelehenetik igandera egongo da martxan, jaiegunak barne, 10.00etatik 20.00etara, gutxi gorabehera 20 minuturo. Ibilbideak puntu estrategikoak lotuko ditu, hala nola Arriluceko Markesaren ingurua edo Algortako gasolindegia eta kasinoa.
Ibilbidea Areetaraino iritsiko da, eta Las Mercedes elizan geldialdia egingo du, auzo horretatik hondartzarekiko lotura indartuz. Zerbitzua hiriko autobus irisgarri baten bidez emango da, tamaina ertainekoa eta udalerriko kaleen ezaugarrietara egokitua. Mugikortasun urriko pertsonentzako lekua izango du.
