Wallis Simpson (Bessie Wallis Warfield jaioa; 1896ko ekainaren 19a - 1986ko apirilaren 24a), Windsoreko dukesa eta estatubatuar ‘socialite’-a, goi-mailako familia aberats batean jaio zen. Aita oso txikia zela hil zitzaion, eta koinatuak ekonomikoki lagundu behar izan zion amari, Walliseko barnetegia, Olfield School, ordaindu ahal izan zezan. 

Inguruetako emakumeen eskolarik garestiena zen eta, han, Wallis ezaguna egin zen bere kideen artean, dotore eta oso ondo jantzita joaten zelako beti.

1916an, Earl Winfield Spencer Itsas Armadako hegazkinlariarekin ezkondu zen, baina 1926an dibortziatu zen. Ordurako Ernest Aldrich Simpson ezagutu zuen, 1928an berarekin ezkondu zen negozio gizona. Wallisentzat irtenbide bat zen, bere bizitzako une hartan ez baitzuen lanik, ez etxerik eta ia ez baitzitzaion dirurik geratzen.

Dena erabat aldatu zitzaion, Londresera bizitzera joan eta, 1931n, Galesko printzea ezagutu zuenean ehizaldi baterako asteburuko bidaia batean.

Bigarren Mundu Gerraren aurreko garaian printzeak naziekin eta Hitlerrekin zituen harremanak ez ziren britaniar Gobernuaren gustukoak. Horrez gain, bi aldiz dibortziatutako emakume batekin maitemindu eta ezkontzeko hautua egin zuen.

Ezkontza neurri epikoko estatu-arazo bihurtu zen Ingalaterran. Hainbat zurrumurru zabaldu ziren Wallisen inguruan: Ekialde Urrunean maitasun-arte bikainak ikasi eta Erregea zoratu egin zuela; maitale asko zituela, tartean 21 urteko Galeazzo Ciano konde faxista italiarra...

Hilabete bakarra izan zen errege Edward VIII.a George VI.a anaiaren alde abdikatu zuelako. Koroarik gabe, baina Wallis ondoan zuela, pozik bizi izan zen Windsoreko duke titulu berriarekin Pariseko Bois de Boulogne erdian lorategi handiak zituen jauregi batean, frantziar Estatuaren opari. 

Wallisek denbora gehien hartzen zuen gaietako bi ziren: bere bitxiak –Cartierrek zioen diamanteetan bera baino jantziagoa zegoela– eta bere jantzigela. Cristobal Balenciaga diseinatzailearen bezero fidela zen; are gehiago, getariarrak urdin kolore propio bat sortu zuen berarentzat.