Bilboko Udalak Clown Zorrotza programaren edizio berria antolatu du ostiraletik igandera, maiatzaren 9tik 11ra, eta horren barruan, bost ikuskizun eskainiko ditu Zorrotzako Azoka parkean. Emanaldi guztiak doakoak izango dira eta adin guztietako pertsonentzat pentsatuta daude.
Antolakuntzak jakinarazi duenez, programazioa ostiralean hasiko da, maiatzaren 9an, 18.00etan, La Pez konpainiak eskainiko duen ‘J. M. Brutal’ euskarazko ikuskizunarekin. Ibilbide luzeko konpainia da La Pez, eta 2024an Leioako Umore Azokako EAEko ikuskizun onenaren Plaza saria irabazi zuen.
Ondoren, 19.00etan La Roca Producciones taldeak ‘Zozobra’ eskainiko du, «gure giroan gero eta tipikoagoak ez diren pertsonaiei buruzko antzezpen umoretsu eta gogoetatsu baten bidez kontzientziak astindu nahi dituen ikuskizuna».
Larunbatean, maiatzaren 10ean, lehen emanaldia 18.00etan hasiko da, Cía. La Churry konpainiaren ‘WOOOOW’ obra «ikusgarri eta dibertigarriarekin», eta jarraian, 19.00etan, Los Putos Makinas konpainiak inprobisazioan eta antzerki jokoan oinarritutako hiru estilo erabat desberdin uztartzen dituen ‘Piti Peta Hofen Show’ eskainiko du.
Clown Zorrotza amaitzeko, igandean, maiatzaren 11n, To R Mansion konpainia japoniarrak ‘Dive/Journey’ komedia eskainiko du 12.00etan. Marx anaien umorearen elementuak konpainia japoniarraren erritmo bereziarekin uztartzen dituen lana da.
