Gaurko egunez hil zen 1921ean, Maria de los Angeles Sorazu edo Florencia Sorazu Aizpurua, jaiotza izenez. Zumaian sortua, 1873an, gaztelaniazko idazle mistiko onenetako bat da Sorazu, aditu askoren arabera.
‘La vida espiritual’ (1918), ‘Exposición de varios pasajes de la Sagrada Escritura’ (1926) edo ‘Opúsculos marianos’ (1928) dira bere idazlan garrantzitsuenetako batzuk.
Familia pobre batean jaio zen Florencia Sorazu. Bere biografiak dio arrain saltzailea zuela aita eta neskamea, ama. Haurtzaroan Zestoa, Donostia eta Tolosan igaro zuen, eta ume bat zela, hamahiru urterekin, joan behar izan zuen neskame Donostiara. Beranduago Tolosako Boinas Elosegi txapel fabrikan ere egin zuen lan.
Hain zen pobrea Florencia Sorazuren familia, komentuan sartzeko hautua egin zuela baina moja saria ordaindu beharreko adina ez zuela.
Apaiz baten aholkua jarraituz, musika ikasi zuen, doterik izan ez arren komentuan onartua izatea lortzeko. Azkenean, lortu zuen Valladolideko Konzezioko komentuan sartzea eta behin eta berriro izan zen proposatua komentu abadesa izateko.
1904an bihurtu zen abadesa, eta hil arte mantendu zuen kargua. Komentuan bertan hil zen 1921ean.
Maria de los Angeles Sorazu dohatsu aitortua izateko prozesua zabalik dago 80ko hamarkadako amaieratik.
