Turismo sektoreko elkarte eta fundazioentzako laguntzak iragarri ditu Arabako Diputazioak

Turismo-eskaintza hobetzeko proiektuak eta jarduerak finantzatzera bideratutako laguntzen deialdi berri bat iragarri du Arabako Foru Aldundiak. Enoturismoa, landa inauteriak eta bisita gidatuekin lotutako ekitaldiak laguntzeaz gain, bidaiarien eskura dauden azpiegiturak hobetzea ere badute helburu.

Arabako Foru Aldundiko Enplegu, Merkataritza eta Turismo Sailak 146.736 euroko partida bideratuko du bidaiarientzako zerbitzuen eta esperientzien eskaintza modernizatzeko eta hobetzeko proiektuak finantzatzeko.

Turismo ostatuen elkarteak, udalerrietako sustapen elkarteak, kultur elkarteak eta turismo zerbitzuak eskaintzan dituzten fundazioak dira erakunde onuradunak.

Cristina Gonzalez Enplegu, Merkataritza eta Turismo diputatuaren hitzetan, tokiko eta eskualdeko elkarte horiek «funtsezkoak dira turismo-eskaintza osoa eta askotarikoa eratzeko, eta, horrela, Araba kalitatezko helmuga gisa sendotzeko».

Laguntzak «eskaintza hori» hobetzera daude zuzenduta, «baliabide materialak eta zerbitzuak modernizatu eta sustapen-ekintzak» egiteko, baita ekitaldien antolaketa finantzatu ere, «oso garrantzitsuak baitira bidaiariak erakartzeko eta sektorea dinamizatzeko».

Zehaztu du aurten diruz lagunduko direla enoturismoarekin, landa-inauteriekin eta bisita gidatuekin lotutako ekitaldiak, besteak beste.

Arabako Foru Aldundiak bi deialdiren bidez ematen ditu laguntza ekonomiko horiek. Lehenengoak 130.772 euroko zuzkidura du, eta elkarte eta fundazioei ekitaldiak antolatzeko, biltzarrak egiteko, publizitatea kontratatzeko, web-orriak eguneratzeko eta turismo-jarduerak (bisita gidatuak, tailerrak eta ibilbideak) eskaintzeko helburua du.

Horrela, eta laguntza-lerro honen bitartez, besteak beste, ‘Samaniego in Wine’ eta ‘Villabuena Wine Fest’ ekitaldi enoturistikoak finantzatuko dira, Samaniegoko Turismo Sustapenaren aldeko Elkarteak eta Villabuenako Sustapenerako Elkarteak antolatzen dituztenak, hurrenez hurren; eta Villodasko landa-inauteriak eta Iruña Okako Arkiz Kultur Elkarteak antolatzen duen ‘Ilargiaren Festa’.

Finantzatutako beste proiektu batzuk hauek dira: jarduera kultural eta artistikoak, eta La Robleda de los Sueños bideomappinga (Kexaa, Aiaraldea), Añanako Gatz Harana Fundazioaren eta Artium Fundazioaren bisita gidatuak eta ekitaldiak, eta Arabako Ostatu Turistikoen Elkarteak (Arabatur) sustatzen duen ‘Hoststik’ ostatu turistikoen sektorearen kongresua.

Inbertsio proiektuak finantzatzeko

Bestalde, bigarren laguntza-lerroak 16.000 euroko zuzkidura du, eta turismo-sektoreko elkarte eta fundazioen inbertsio-proiektuak finantzatzera bideratuta dago, irabazi-asmorik gabeko erakunde horiek bidaiarien eskura jartzen dituzten «azpiegiturak eta zerbitzuak hobetzeko» helburuarekin.

Deialdi honen bidez finantzatuko da Aguaqueko ur-jauzira doan bidean pasabide berri bat jartzea, Antoñanako Sustapen eta Garapenerako Elkarteak sustatuko proiektuaren barruan, eta Arabaturrek eta Done Jakue Bideen Kultur Elkarteak bizikleta elektrikoak erostea.