Irailaren 1ean irekiko dute Gipuzkoako 2026ko egutegia osatzeko argazki lehiaketa

2026ko Gipuzkoako egutegi ofiziala osatuko duten irudiak aukeratzeko lehiaketak irailaren 1ean zabalduko du lanak aurkezteko epea. Foru Aldundiak antolatzen du ekimena Gipuzkoako Argazkilari Elkartearen laguntzarekin.

Irailaren 1etik 30era lanak aurkezteko epea zabaluko dute Gipuzkoako 2026ko egutegi ofiziala osatuko duten irudiak hautatzeko argazki lehiaketan.

Gipuzkoako Foru Aldundiak antolatzen du ekimena, eta edizio honetan ‘Ekin. Zaindu. Bizi’ izango da gaia. Diputazioko arduradunen esanetan, «herritar guztien ongizate integralarekiko konpromiso instituzionala laburbiltzen duen izenburua da.

«Lurraldearen nortasuna islatzen duen leloa da: Gipuzkoa bizi, dinamikoa eta ondare natural, kultural eta industrial aberatsa duena; etorkizunerako bokazioarekin aurrera egiten duen lurraldea, pertsonak eta ingurunea zaintzen dituena, eta ongizate osoaren aldeko apustua egiten duena», zehaztu dute herritarrei parte hartzera luzatutako gonbidapenean.

18 urtetik gorako lagunek har dezakete parte, eta inspirazioa bilatzen dutenentzat, Gipuzkoaren «esentzia isladatzea» eta lurraldearen «edertasuna eta berezitasunak» irudi bihurtzeko aukera baliatzera deitu dute.

Gehienez hiru argazki aurkeztu ahal izango ditu parte hartzaile bakoitzak, «originalak, argitaragabeak eta Gipuzkoan ateratakoak». Kolorean zein zuribeltzean aurkez daitezke, eta edizio digitala baimenduta badago ere «ez da onartuko irudiak manipulatzea, elementuak sartzea edo ezabatzea, ezta sortzerakoan adimen artifiziala erabiltzea ere».

Foru Aldundiaren webgunean eskuragarri dago lehiaketaren inguruko informazio guztia, eta parte hartzaileek orri horetan bertan aurkez ditzakete argazkiak.