Pilar Belzunce mezenasaren jaiotzaren mendeurrena

Gaur 100 urte bete dira Pilar Belzunce jaio zenetik, Eduardo Chillidaren emaztea eta bere bizitzan eta ibilbide artistikoan giltzarri.

Pilar Belzunce de Carlos 1925eko urriaren 9 jaio zen Filipinetan, Iloló hirian, familia nafar batean. Bere aita azukre plantazioetan aritzen zen, eta gerora Euskal Herrira itzuli ziren. Donostia inguruan hazi zen, eta gaztetatik ezagutu zuen Eduardo Chillida eskultorea. 1950ean ezkondu ziren, eta bizitza osoan zehar bikote estua osatu zuten.

1984an, bikoteak XVI. mendeko finka zahar bat bisitatu zuen Hernanin, Zabalaga baserria, eta hurrengo urtean erosi egin zuen.

Gerora, Pilar Belzuncek lagundu zuen Hernaniko Zabalaga baserrian Chillida Leku museoa sortzen, artea eta natura uztartzen dituen espazio paregabean kokatua. Gainera, Eduardo Chillida – Pilar Belzunce Fundazioa sortu zuen, eskultorearen obra eta artxiboen zaintza eta ikerketa bultzatzeko.

2015eko uztailaren 4an hil zen Donostian, 89 urte zituela. Bere heriotzaren ondoren, omenaldi ugari jaso zituen, batez ere Chillida Lekun, bere izena eta lana euskal artearen historiaren parte gisa aitortuz.

Bere jaiotzaren 100 mendeurrena ospatzeko, Chillida Lekuk erakusketa bat inauguratu zuen ekainaren 5ean. Zabalaga baserriko 5. aretoan kokatua, Eduardo Chillidak berari eta bere zortzi seme-alabei buruz egindako erretratuen bidez, «bere garaiari aurrea hartzeko gai izan zen erabakitasun handiko emakumearen nortasunaren zati txikiak» ezagutaraziko ditu erakusketak.