Foo Fighters talde mitikoko bateria jotzailzea zen Taylor Hawkins hil zen 2022ko martxoak 25ean, 50 urte zituela. Taldea Latinoamerikatik biran zegoen eta gau hartan Bogotako Picnic Stereo jaialdian jotzekoak ziren. Musikariak bularrean mina sentitu zuen eta larrialdi zerbitzuetara deitu zuten laguntza eske. Iritsi zenerako jada hilda zegoen. Autopsiaren arabera, bere organismoan botika desberdinak aurkitu ziren.

Hawkins oso gaztetan hasi zen musika munduan Texaseko taldeekin elkarlanean. Bateria jotzeaz gain, kantak konposatzeko ardura ere bazuen eta musikari onaren ospea irabazten joan zen. Alanis Morissette-en Sexual Chocolate taldean aritu zen arrakasta handiz, baina orduan beste talde baten eskaintza iritsi zitzaion. Erabaki zaila izan zen arren, azkenean Sexual Chocolate utzi eta Foo Fighters taldera joatea erabaki zuen 1997an.

Dave Grohl, Foo Fighterseko liderra, Nirvanako bateria jotzailea izan zen eta berak osatutako talde berriko lanak grabatzean ere berak jo zuen bateria, 1995ko 'Foo Fighters' eta 1997ko 'The Colour and the Shape' disketan (azken honetan William Goldsmithek parte hartu zuen, baina taldea utzi zuen).

Hawkins Nirvanaren jarraitzailea zen eta haren bateria jotzaileak berarekin lana egin nahi izatea «sinestezina» izan zen. «Alanis Morissette-en taldera batu berri nintzen eta Estatu Batuetatik biran geunden, ahalik eta pub gehienetan jotzen. Furgonetan hiru edo lau diska zeuden etengabe entzuten genituenak, eta horietako bat zen Foo Fightersen lehena. Gu denok, Alanis barne, lan hartaz maitemindu ginen», kontatu zuen behin Hawkinsek.

Gustoko zuen talde hartara batzeko aukera ikusi zuenean erabakia hartzea benetan zaila egin zitzaion, hain justu, miresten zuen taldea zelako, baina unean zegoen taldean pozik zegoelako; rock taldea zen Morissette-ena, eta berak rock talde batean egon nahi zuen. Alde egitea erabaki zuenean konturatu zen egokiena egin zuela, Morissette-ek berak beste doinu lasaiago bateranzko norabidea hartu zuelako. «Bere hurrengo diskoa lasaiagoa izan zen. Uste dut haserre zegoen neskaren plantak egiteaz nazkatu zela –kontatu zuen–, eta nik gogorragoa izan nahi nuen».

Foo Fightersek bateria jotzaile berria behar zuela jakin zuenean, Dave Grohlen telefonoa lortu eta bere burua eskaini zuen. Ordutik, taldeak indarra hartu zuen eta egun rock musikako historiako talderik ezagunenen artean kokatzen da. Bertan jo zuen hil zen arte, bere ondarea ondo errotuta utziz.