Plazako dantzak, erromeriak, dantza tradizionaletan trebatzeko ikastaro eta tailerrak... euskal dantzek Arratiako kaleak hartuko dituzte asteburuan, ‘DansPirenaika’ egitasmoaren eskutik.
Aiko taldeak bultzatuta, mugaz gaindiko proiektua da, Pirinioetako dantza tradizionalak partekatzeko eta gozatzeko helburu duena. Azaldu dutenez, «Pirinioak kultur topagune gisa ulertzen ditu» egitasmoak, «pertsonen eta elkarteen arteko harremanak sendotuz eta kultura partekatuz».
Arratiakoa ez da ekimenak izan duen lehen hitzordua, Hechon (Huesca), Izaban eta Larzabalen izan baita DansPirenaika. Hurrengo emanaldiek Arratiara eramango dute proiektua, dantzez eta musikaz beteriko asteburu bat eskainiz, 4an hasi eta 6ra arte luzatuko baitira ekitaldiak.
Aiko taldetik azaldu dutenez, dantzariei eta profesionalei zuzendutako ekitaldiak dira baina ez kolektibo horientzat bakarrik, herritar guztiak gonbidatu baitituzte «esperientzia berezi hau komunitate osoarekin partekatzeko».
Eragileen arteko elkar ezagutza
Akitania Berria-EAE-Nafarroa Euroeskualdea da ekimenaren babesle nagusia, ‘Euroeskualdeko Hiritartasuna’ deialdiaren barruan. «Herrialde ezberdinetako eragileen elkar ezagutza sustatzea eta kultura bultzatzea helburu dituena.
Areatzako eskoletan hasiko dira ekitaldiak ostiralean. Arratsaldeko 16.30ean izango da ongietorri ekitaldia, ‘mutildantzekin’ abiatuko da egitaraua eta Tafallako Jotarekin ondoren, biak Iakok eskainita, eta Roberto Etxebarriaren ‘Mazurka klandestinoa’ proposamenak itxiko ditu ostiraleko emanaldiak.
12 orduko egitarua eta erromeria
Larunbaterako 12 ordu baino gehiagoz luzatuko den programa prestatu dute. 10.00etan abiatuko da Aikoren ‘Jauziekin jolasten’ proposamenarekin, Elchoko jotaren inguruko saioa eta Jarauta69 fanfarreak eta Bizkaiko gaiteroek girotutako dantza-poteoak beteko dute goiza, eta ‘Kiloemtro Zero’ bazkari herrikoia prestatu dute.
Erromerien zale amorratuek aukera paregabea izango dute arratsaldean Areatzan. 19.00etan hasiko da udal bandarekin egingo duten saioa, eta egunari bukaera emateko, Aiko arduratuko da Mazurka klandestinoa girotzeaz.
Igande goizean berrartuko dute egitaraua Aragoiko formula erritmikoetan murgiltzeko proposamen batekin, ‘jotak nahieran’ eskainiko ditu Aikok eguerdira arte, eta 13.00etan hasitako dantza-poteoak eta erromeriak itxiko dute egitaraua.
Aikok zehaztu duenez, plaza mugatuak dira eta 50 euroko kostua du ikastaro guztietan parte hartzeko matrikulak, baina doakoa da 18 eta 30 urte bitarteko gazteentzat.
Izen-ematea Aiko dantza eskolaren webgunearen bitartez egin behar da.
