Arabako Foru Gobernu Kontseiluak Gorbeiako Parke Naturalean Egilolarra bidea lehengoratzeko lanen proiektua eta kontratazioa onartu ditu. Lanen aurrekontua 208.954,66 eurokoa da, BEZa barne, eta hiru hilabeteko epea du gauzatzeko.

Ramiro Gonzalez Arabako ahaldun nagusiak prentsaurrekoan adierazi duenez, 2019. urtean egindako foru-azterlan baten arabera, Egilolarran ez zegoen bidezidorraren marra argirik, zuhaitzen sustraiek eragindako lurzoruaren erabateko trinkotzeagatik, eta higaduragatik.

Gonzalezek eman dituen azalpenen arabera, halaber, Muruarako bidexkatik gailurrera igotzeko azken zatian, bigarren mailako bidexka ugari daudela, eta ibilgailuak eta oinezkoak etengabe igarotzeak ingurumen-inpaktu handiagoa eragin dezakeela, zapaldutako azalera handitu eta landarediari kalte eraginez.

Horregatik, bide horren erabilera publikoaren arazoa konpontzeko eta lurrak jasaten duen higaduraren ondorioz lurzorua galtzea saihesteko, Egilolarrako pagadiaren eta Gorbeia mendiaren gailurraren arteko oinezkoentzako bidearen inguruko lurzorua eta landaredia lehengoratuko dira.

Jarduera Helmugako Jasangarritasun Turistikoko Planaren barruan dago, ‘Parke Naturalen STAP’, Europar Batasunak finantzatutako Berreskurapen, Eraldaketa eta Erresilientzia Planaren barruan.