BideON Arratianek, 65 urtetik gorakoentzako eta hiriguneetatik eta garraio publiko konbentzionalaren konektibitate-nodoetatik urrun dauden landa-eremuetan bizi diren unibertsitateko gazteentzako zerbitzuak, 10.000 bidaia baino gehiago egitea ahalbidetu du 2024ko otsailean abian jarri zenetik.
Horrek esan nahi du 20 joan-etorri egiten direla egunero, modu jasangarrian eta eskaeraren arabera. Esperientzia «bikaina» izan da erabiltzaileen balorazioan.
Bizkaiko Foru Aldundiak jakitera eman duenez, bidaia guztien %87 gutxi gorabehera, 65 urtetik gorakoen taldeari dagozkio, %7 desgaitasunen bat duten edo mendekotasun-egoeran dauden pertsonen kolektiboari, eta %6 unibertsitateko, goi mailako lanbide-heziketako edo helduen eskoletako ikasleei.
Bizkaiko Foru Aldundiak azaldu duenez, BideON Arratian «mugikortasun iraunkorreko ekimen bat da, biztanle-dentsitate txikiko gune sakabanatuetan bizi diren pertsonei ibilgailu pribatuaren ordezko garraiobideak eskaintzen dizkiena, funtsezko zerbitzuetara edo ikasketa-zentroetara joateko».
Eskualdeko tokirik eskatuenak Igorre, Dima eta Lemoa izan dira, hemen Euskotreneko geltokiarekiko interkonexioarekin. Neurri txikiagoan daude Artea, Zeanuri eta Arratiako Mankomunitatearen Dimako egoitza.
Eskualdetik haratagoko joan-etorrien kasuan, gehien eskatu diren lekuak Galdakao-Usansoloko Ospitalea, Galdakaoko eta Amorebieta-Etxanoko anbulatorioak eta Leioako campusera doan Bizkaibuseko geltokia izan dira.
Bizkaiko Foru Aldundiak nabarmendu du, halaber, ibilgailua modu partekatuan erabiltzeak lagundu egin duela atmosferara isurtzen diren berotegi-efektuko gasak murrizten, eta, horri esker bost tona CO2 inguru aurreztu dela.
Nota oso ona erabiltzaileen artean
BideON Arratian proiektuak bikain nota jaso du erabiltzaileen aldetik, eta zerbitzu hori bikaina dela esan dute. Gehienez 5 puntuko notaren gainean, eskatzaileek 4,9 puntu eman dizkiote zerbitzuari, 5 puntu jasotako arretari, 4,8 puntu gidariari eta 4,9 erabilitako ibilgailuari.
BideON Arratian proiektu pilotu bat da, non Bizkaiko Foru Aldundiak 900.000 euro inbertitu dituen eta eskualdean identifikatutako erronka nagusietako bat gauzatzen duen Foru Erakundeak udalerriekin elkarlanean abian jarritako ‘Herri Txiki, Aukera Handi’ parte-hartze prozesuaren bidez.
Bizkaiko udalerrietan bizi-kalitatea hobetzea helburu duen partaidetza-prozesu honek, zerbitzu publikoen eskaintza ekitatiboa eskainiz, eskualdeko erdiko arterian trafikoa arintzera bideratutako beste jarduera garrantzitsu batzuk ere inplementatzea ekarri du. Nabarmentzekoak dira, besteak beste, N-240 errepideko bazterbideak edo bidesaria kobratzeko ‘free flow’ arkuak.
Arratiako Mankomunitateak eta eskualdeko udalek (Arantzazu, Areatza, Artea, Bedia, Dima, Igorre, Lemoa, Ubide eta Zeanuri) zerbitzu horri jarraipena ematea erabaki dute, nahiz eta erabiltzaileei iragarri dieten eten egin beharko dutela denbora batez, zerbitzua jarraitzeko behar diren izapide administratibo eta legal guztiak bete arte.
