Errekorreko zifrak lortu zituen Budapestek bere Harrotasunaren Martxaren 30. edizioan. 200.000 pertsona inguru elkartu ziren. Egun hori ospatzeko herrialdean inoiz egin den manifestaziorik handiena izan zen. Orain arte jendetsuena 35.000 pertsonetakoa zen.

Festa giroa nagusitu zen bertan, gobernuaren mehatxuak alde batera utziz.

Izan ere, Hungariako Lehen Ministroa den Viktor Orbanek urteak daramatza bere ideologia atzerakoiaren bidez pertsonen eskubideen aurkako legeak ezartzen. Bere azken pausoa, LGTBIQ+ pertsonen identitatea ezabatu nahi izatea da, eta horretarako ekainaren 28an ospatu ohi den festa debekatu zuen.

Aniko Soltesz 76 urteko pentsionistak argi du: «Eskubideen edozein murrizketari erabat aurka egiten diot. Uste dut denek izan beharko luketela bikotekidea aukeratzeko askatasuna, eta sakonki gaitzesten dut biltzeko eskubidea eta askatasunak zapaltzeko joera duten murrizketa guztiak, eta horregatik nago hemen».

Debeku eta isunen mehatxuei jaramonik egin gabe, are harrotasun handiagoarekin atera ziren milaka pertsonak kalera.  

«Gai honi buruzko aholku juridiko guztiak entzun ditugu. Hemen egotearen balioak eta askatasunaren, onarpenaren eta tolerantziaren aldeko nire jarrera defendatzeko konpromisoa hartzen dut. Beraz, poliziak legez kanpoko ekintzaren bat egin dudala erabakitzen badu, nire jarrerari eutsiko diot auzitegian, ez dut inolako zalantzarik», aldarrikatu zuen 40 urteko Krisztian Takacsek.

«Askatasunari buruz ari gara»

Europa osotik iritsitako jendea bildu zen han, hungariarrei babesa eskaintzeko. Hiriko gobernua ere alde zuten, zeinek martxa normaltasunez egiteko babesa eskaini zien. Talde ultraeskuindarren erasoek ere ezin izan zuten koloretako uholdea gelditu.
 
«Egia esan, gehiengo sexualaren kide naiz. Piztia heterosexual dominante bat naiz. Baina askatasunari buruz ari gara. Bakoitza genetikoki izateko eman zaiona izateari buruzkoa da. Ez esan gezurrik; ez da hezkuntza kontua, ezin da norbait berriro hezi, inor ez da kutsatzen. Hori da hemen kontra egin nahi diogun propaganda gorrotagarria», adierazi zuen Endre Netusi 56 urteko mekanikoak.

Budapesteko kaleak kolore guztietako bihotzez bete ziren, erakutsiz elkarrekin indartsuak garela. Hala, aniztasuna birrindu nahi dutenek jakin beharko lukete maitasuna dela mundua mugitzen duena, eta horren aurka ezin dutela ezer egin.