Herritarrek egindako eskariari erantzunez, Elexaldeko kiroldegiaren ordutegia bi orduz aurreratu dela jakinarazi du Galdakaoko Udalak. Aste honetan bertan hasi da ateak 9.00etan zabaltzen, eta horrela jarraituko du Urretako kiroldegia berriz ireki arte. Irekiera irailaren 1erako aurreikusita dago.

Udalak zehaztu du erabakia udal kirol instalazioetako erabiltzaileen eskarian oinarrituta dagoela. Nabarmendu duenez, erabiltzaileei malgutasun handiagoa eskaintzea da neurriaren helburua, baita jende gehien biltzen den denbora tarteetan pilaketa arintzea ere.

Lehen orduan entrenatzera doazen herritarrak izango dira onuradun nagusiak. Orain arte, Elexaldeko kiroldegiak 11.00etan zuen irekiera ordua. Erabakiarekin bi ordu irabazten dituzte erabiltzaileek goizeko ordutegian.

Neurria, hala ere, Urretako kiroldegia handitzeko eta hobetzeko lanen bukaerara arte egongo da indarrean. Lan horiek irailaren 1erako bukatuta egotea aurreikusten da.

Ohar bidez, erabiltzaileen «ulermena eta lankidetza» eskertu du Udalak, eta «udako kirol zerbitzuak erabiltzen jarraitzeko gonbitea» luzatu die herritarrei, «bizimodu aktibo eta osasungarria izateko baliagarri delako».