Getxoko Nazioarteko Jazz jaialdiak 49. ekitaldiko talde lehiaketan izena emateko epea ireki du otsailaren 13ra arte. Aurtengo edizioa uztailaren 1etik 5era izango da eta lehiaketaren deialdiari buruzko informazio osoa Getxo Kulturaren webgunean jaso daiteke (https://getxo-kultura.eus/deialdiak.

Getxoko Udaletik jakinarazi dutenez, «jazz musika jotzen duten edozein joera edo estilotako Europako» bandei zuzenduta dago lehiaketa, baina parte hartu ahal izateko, taldekideen gehienezko adina 30 urte izan behar da, 2026. urtean betetzekoa eta inskribatzeko orduan egiaztatu beharrekoa. 

Guztira, lau talde aukeratuko dira finalean lehiatzeko, bakoitza jazzaldiaren lehenengo lau egunetan arituko da, eta irabazleak azken egunean ere joko du.

Sariei dagokienez, talde irabazleak 4.900 euro jasoko ditu eta disko bat grabatuko zaio zuzenean. Bigarren sariari 1.900 euro dagozkio eta, azkenik, bakarlaririk onenak 950 euro irabaziko ditu. Halaber, finalerako hautatutako lau bandek laguntzak jasoko dituzte dieta gisa (bidaia, egile eskubideak), eta egonaldia antolatzaileen kontura izango da.

Sariez gain, ohikoa den moduan, irabazleek Lovainako (Belgika) B-Jazz eta Eivissa Jazz jaialdietan parte hartuko dute, jazzaldi getxoztarrak horiekin duen akordioari esker.