Salvador Azpiazu Imbert (1867-1927) gasteiztarrak XX. mendearen hasieran Portugaleten egindako argazki honetan, eskuinean, 1966an eraitsitako Txabarri jauregia ikus daiteke. Jean Batiste Darroquy arkitektoak diseinatu zuen. Darroquy Donibane Lohizunekoa zen eta Bilboko Campos Eliseos antzokia eta Montero etxea bezalako eraikinen arduraduna ere izan zen. Irudian, lehen planoan, egurrezko pasabidea ikusten da. Bertan, herritar batzuk itsasadarrera begira daude, eta hondarretan Portugaleteko hondartzako bainu-etxolak lerrokatuta ageri dira. Hondartza 1950eko hamarkadaren amaieran desagertu zen, hondarra murrizten joan baitzen dragatzeen, itsasadarraren kanalizazioaren eta kanpoko portuaren eraikuntzaren ondorioz. Parean, berriz, Pilotu Nagusiaren Dorrea agertzen da, Bizkaiko Zubia partzialki ezkutatuz. Dorrea, jauregia bezala, kanpoko portuko obrekin desagertu zen. Atzealdean, Bizkaiko Labe Garaien aurrekaria izan zen «La Vizcaya» enpresako kea bereizten da.