Arrakastaren ehorzketak

Egunkarian sartu nintzenean, Maite Ubiria izan zen nire lehendabiziko nagusia, Iritzia sailean. Zerbait ondo ateratzen zitzaigunean, «adi, martxa honetan arrakastaz hilko gara-eta» esateko ohitura zuen. Gorka Altunak, EKHEko kontseilari delegatuak, gure «prestigio erreserbekin» egiten zigun txantxa; industria-nabe bat betetzeko bezainbeste omen geneuzkan. Ubiriak, egunkari ona egitea zein zaila den gogoratuz, eta Altunak, enpresa aurrera ateratzea zein gogorra zen erakutsiz, lanbide honi buruzko kontakizun batzuen aurkako txertoa jarri ziguten.

Horregatik, komunikabideen sektoreko “arrakasta kasuak” susmagarriak iruditzen zaizkit. Proiekturen batek gure egiturazko krisia konpondu duela dirudienean, hortik gutxira saldu egingo dutela baieztatu dut; eta ez da sekula errentagarria izango. Bestela, ez zen bideragarria eta segituan porrot egingo du.

Azken kasua “Relevo” da, Vocentoren kiroletako goiburu digitala. Hiru urteko ibilbide arrakastatsuaren ondoren itxi berri dute, taldea berregituratzeko planen barruan. Aste honetan hasi da 75 langileak kaleratzeko negoziazioa, arlo teknologikoko dozena erdia albo batera utzita. 2022an, proiektua zabaldu zutenean, 5 urteko galerak izango zituztela aurreikusi zuten. Hirugarrenean giltza eman diote, galerengatik.

Vocentok 97,2 milioi euroko galera garbiekin eta 8,9 milioiko EBITDA negatiboarekin itxi du 2024 urtea. Publizitateak %7 egin zuen behera prentsan, eta diru-sarrera orokorrek %4,9 egin zuten behera. Eta hori euskal administrazioek talde horretan inbertitzen duten dirutza kontuan hartuta. Manuel Mirat kontseilari delegatu berriak akziodunen agindua du emaitza horiei buelta emateko. Murrizketak horren parte dira.

“Relevo” ixteko erabakia hartu dutenerako, Vocentok murrizketak egin ditu. Adibidez, Zamudioko errotatibatik 57 langile kaleratu ditu eta “Abc” edo Colpisako erredakzioetan doikuntzak egin ditu. Premiazkoa zaio zuloak estaltzea eta, gainera, dirua lortzea. Horretarako negozio errentagarriak ari da saltzen, hala nola ‘Pisos.com’, 22,5 milioiren truke.

158.000 harpidedun digital dituztela esan dute, iaz baino %15 gehiago. Horietatik, 99.000 harpidedun inguru “On+”-ekoak dira, «Estatuko eskualdeetako» egunkarietakoak. Horien artean daude “DV” eta “El Correo”. Atera kontuak, ez dirudielako agintari batzuek egozten dieten indarra dutenik. Bestalde, 60.000 harpidetza inguru “Abc” egunkarikoak dira, ia erabat Madrilen kokatzen den komunikabidea. Ondo legoke harpidetza horietatik zenbat diren instituzionalak ezagutzea. Vocentoren arabera, dagoeneko prentsaren negozioaren laurdena alor digitalari dagokio.

Horregatik, are esanguratsuagoa da Vocentok bere esperimentu digital ausartena baztertzea eta negozio tradizionalagoetan babestea. Kazetaritzaren ikuspuntutik, ondo ari ziren. Hainbeste bitarteko ez ditugun erredakzioetan egin nahiko genituzkeen gauzak egiteko gai ziren. Zentzu horretan, “Relevo” apustu indartsua zen, handinahia eta garestia. Beren ametsetan gaztelerazko “The Athletic” bihurtu nahi zuten.

“The Athletic” “New York Times” egunkariak erosi zuen kirol proiektua da. Etorkizuna omen zen, baina ez dago argi defizitarioa ez ote den. Hain zuzen ere, “Relevo”-ren helburuen artean kirol prentsa tradizionalari alternatiba bat bilatzea zegoen, paperean; telebistan eta sareetan audientzia handia duen arren, negozio izateko zailtasun handiak dituelako.

Munduan bezala, Euskal Herrian komunikabideen sektoreari buruzko gogoeta urgentea da. Bitartean, utz diezaiogun ospe oneko kutxak eta arrakastaz jantzitako ehorzketak diru publikoarekin finantzatzeari. •