Nazioarteko 80 ikasle daude Urdaibaiko Erreserban, ‘Global Classroom 2025’ ekimenaren barruan

‘Global Classroom 2025’ programaren baitan nazioarteko 80 ikasle inguru egongo dira hiru egunez BBK Urdaibai Zentroan. Klima aldaketaren inguruko kontzientzia, ohitura jasangarriak eta Planeta babesteko konpromisoa izango dira egonaldiaren ardatz nagusietako batzuk.

BBK Urdaibai Zentroak ‘Global Classroom 2025’ proiektuan parte hartu duten 80 ikasle inguru jaso zituen gaur ostegunean, eta aurten Somorrostroko Heziketa Zentroa buru duen egitasmoaren barruan, hiru eguneko egonaldia egingo dute bertan.

Eskozia, Suedia, Alemania, Txekiar Errepublika, AEB, Australia, Hegoafrika eta Bizkaiko ikasleak biltzen duen taldean ekainaren 12ra arte partekatuko dute esperientzia, eta horren barruan, hiru eguneko bizikidetza egingo dute Urdaibaiko Biosfera Erreserbaren bihotzean.

BBK Urdaibain egingo duten egonaldian, klima aldaketa landuko dute kontzientzia sortzeko, eta erantzukizuna eta ekintza sustatzeko. Gainera, ‘Global Classroom’-eko parte hartzaileek BBK Klimaren instalazioez gozatuko dute, ohitura jasangarriak sustatzeko eta Planeta babesteko konpromisoa hartzeko hezkuntza-esperientzia eraldatzaileak eskaintzen baititu.

BBK Urdaibaiko nazioarteko ikasleen topaketa hau ‘Global Classroom’ proiektuaren urteko konferentziaren programazioaren parte da, eta urtero herrialde parte hartzaile bati dagokio. Aurten, 2025ean, Somorrostro Heziketa Zentroa arduratzen da antolaketaz eta baita langaia aukeratzeaz ere.

Kulturarteko ikaskuntza

Hainbat kontinentetako erakundeak eta ikasleak batzen dituen hezkuntza-proiektua da, kulturarteko ikaskuntzaren garrantzia sustatzeko helburuarekin. ‘Learn locally, think globally’ (tokian ikasi, globalki pentsatu) leloa du ekimenak.

BBK-k azaldu duenez, Stewart Hay (Lerwick-eko (Shetland uharteak) Anderson High-eko zuzendariordea) eta Lionel Adriaan (Lurmutur Hiriko Harold Cressy-ko zuzendari ohia) hezkuntza globalaren erreferenteek sortu zuten ekimena 1996an.

1997az geroztik, proiektu hori herrialde parte hartzaileetako eskoletan lantzen da, eta eskola horietako bat da egitasmoaren planifikazioaren eta antolaketaren arduraduna. Gainerako parte hartzaileei helaraziko die, ikasturtean zehar lan egiteko eta herrialde anfitrioian topaketa (konferentzia) batekin amaitzeko.

Ikasturtearen hasieran, proiektuan parte hartu nahi duten ikasleak aukeratzen dira ikastetxe bakoitzean, eta urtean zehar beren ikastetxeetan hainbat zeregin egiten dituzte beren burua ezagutarazteko eta gai bat lantzeko, oro har berdintasunarekin, bakearekin eta kultura-aniztasunarekin lotuta.