Usadio zaharrak protagonista dituen Orhipean festa ospatuko dute Otsagabian ostiraletik aurrera

Antzinako bizibide eta usadioak Otsagiko kaleetara itzuliko dira ostiralean eta larunbatean, oroimena eta festa giroa uztartzen dituen Orhipean festan. Aduña ibaiaren ondoan abiatuko dira jarduerak, erritual zaharrak gogora ekarriz.

Bizibide eta usadio zaharrak ardatz dituen Orhipean jaialdiaren edizio berri bat egingo dute ostiralean eta larunbatean Otsagin. 

«Festa bat baino denboran zeharreko bidaia da Orhipean». Kale, keinu eta tradizio bakoitzean bizi diren istorioak «emozioz eta benetakotasunez» berpizteko ahalegina nabarmendu dute antolatzaileek.

Ostiralean, hilaren 29an, abiatuko da hitzordua, Anduña ibaiaren ondoan, «iragana eta oraina lotzen dituzten antzinako erritualak gogora ekarriz».

Aurreratu dutenez, festa giroko kalejira batek emango dio segida programazioari, eta larunbatean (hilak 30), «herria agertoki bizia bihurtuko da» hurrengo lanbideak erakutsiz: garbitzaileak ibaian, iruleak, artile-moztaileak, argazkilaria, dentista eta bizargina, eskola ingurukoak, jostuna, labeko lanak, herriko dendariak... baita arkume-buztanen garbitzaileak ere. 

Goizean zehar «artzainen ogi-mamiak» dastatzeko aukera egongo da, eta ardiak eta akerren ardi-bidea erakutsiko dute. Arratsaldean, ezkila-jotzea izango da elizan, Otsagiko dantzarien emanaldia izango da eta antzinako erako dantzek emango diote amaiera jaialdiari.

Antolatzaileek taberna jarriko dute plazan, edari, pintxo eta bokatekin, jaialdiaren kostuari aurre egiteko.