‘Sari nagusia: ziztu bizian’ filma estreinatzen da gaur Zinema Euskaraz programan

‘Sari nagusia: ziztu bizian’ film alemaniarra euskarara bikoiztu eta Hego Euskal Herriko hainbat zinema aretotara helduko da gaur, Zinema Euskaraz programari esker. Publiko orokorrari zuzenduta, lasterketatako pilotu izatearekin amets egiten duen Edda da protagonista.

Zinema Euskaraz programak ‘Sari nagusia: ziztu bizian’ film alemaniarra estreinatzen du gaur, hilak 29an, EAEko hainbat zinema aretotan. Aurten estreinatuko den zortzigarren filma da, Zineuskadik euskal ikus-entzunezkoen sektoreari laguntzeko sustatutako ekimenaren barruan dago estreinaldia.

Zineuskadik ohar batean gogorarazi du programa honen bidez, Gasteizko Gobernuko Kultura eta Hizkuntza Politika Sailak haur eta gazteentzako filmak bikoiztea bultzatzen duela, eta zinemaren sektorean euskara sustatzen du.

Film honetan, Edda protagonistak lasterketetako pilotu bihurtzearekin egiten du amets. Ustekabean, bere nahia egia bihurtzen da eta Europako Sari Nagusiaren erronkei aurre egiten aurkitzen du bere burua. Han lasterketa saboteatzeko konplot bat aurkituko du.

Filma Florida (Gasteiz), Gorbeia (Gasteiz), Golem Alhondiga (Bilbo), Golem La Morea (Iruñea), SADE Cines (Donostia) eta Niessen (Errenteria) zinemetan proiektatuko da.

Era berean, datozen hilabeteetan Zinema Euskaraz programaren barruan beste hainbat lan proiektatuko dira: ‘Sablehortz kapitaina eta Greleko Kondesa’, irailean; ‘Supercharlie’, urrian, eta 'El tigre perdido', azaroan.