Nabarnizek udalerriko parke publikoak berriztatzeko proiektua lizitatu du

Herriko parke publikoak berriztatzeko proiektua lizitatuko du Nabarnizko Udalak, segurtasuna eta irisgarritasuna ardatz hartuta. Jolasguneak, zoladura eta altzariak berriztatzea da asmoa, erabiltzaileen ongizatea bermatuz. Izan ere, gerizpea emateko zuhaiztiak ere hartuko dituzte kontuan. 

Nabarnizko Udalak Udaletxe, Elexalde, Ikazurieta, Uribarri, Uribarri San Miguel eta Zabaletako parke publikoak osorik berritzeko lanak lizitatu ditu 138.000 euroan (BEZ barne). Jolasgune horiek berritze proiektuetan segurtasuna, irisgarritasuna eta ongizatea bermatu nahi dute.

Lehiaketara atera den proiektu honen helburua urbanizazio-obrak egitea da (zoladura, gerizpea emateko zuhaiztia, iturriak, lurzoru teknikoa, haurrentzako jolas osasungarriak, hiri-altzariak) udalerriko sei aisialdi-eremu nagusietan, indarrean dauden segurtasun eta irisgarritasun araudietara egokituz, lizitazioaren oinarrietan jasotakoaren arabera.

Zehazki, egungo jokoen ordez, segurtasun-araudia betetzen duten eta haurren jarduera fisikoa, kognitiboa eta soziala sustatzen duten elementu berriak jarriko dira; aisialdi-eremuetako zoladurak ordeztuko dira, haurren segurtasuna bermatuz material bigunak eta inpaktu-xurgatzaileak erabiliz, hala nola kautxuzko zoladura edo antzekoa; eta hiri-altzariak berrituko dira (bankuak, paperontziak, etab.), pertsona guztientzako erosotasuna eta irisgarritasuna bermatuz.

Eremu guztiak desgaitasunen bat duten pertsonentzat irisgarriak izango direla ziurtatu nahi da, gurpil-aulkiak eta haur-aulkitxoak ibiltzeko arrapalak eta azal egokiak ezarriz.

Jolasei dagokienez, jolas moderno eta seguruak instalatuko dira, hala nola zabuak, txirristak eta gune interaktiboak, haurren garapen fisikoa eta soziala sustatzeko. Jokoak erabiltzaileen adinaren arabera aukeratuko dira, eta arreta berezia jarriko zaie segurtasunari eta iraunkortasunari.

Bestalde, lehendik dagoen zoladuraren ordez kalitate eta iraunkortasun handiko materialak jarriko dira, hala nola kautxuzko zoladura edo antzekoa, inpaktuak behar bezala xurgatzeko eta istripu-arriskuak murrizteko. Zoladura ere erraz mantendu eta garbitzeko moduan instalatuko da.

Banku eta paperontzi erresistenteak eta ergonomikoak jarriko dira, material birziklagarriz eginak eta kanpoaldeetarako egokiak. Itzaleko elementuak sartuko dira, hala nola markesina bat, foru-errepidearen lerro zuritik 12 metro baino gehiagora kokatuko dena, urte osoan espazio eroso bat bermatzeko, eta postontziak birjarriko dira, errepidearekiko segurtasun-distantziak errespetatuz.

Azkenik, mugikortasun urriko pertsonentzako ibilbide irisgarriak diseinatuko dira, oztopo arkitektonikoak kenduz eta aisialdirako gune guztiak pertsona guztientzat irisgarriak izango direla ziurtatuz.