Hagin sinbolikoen «checklist»-a (eta trantsizio espazioen jakinduria)

Lorpen ukigarrien egiaztapen gose aseezina. Eskuekin sortutako gauzek (egur zati batekin mendira joateko makila zizelkatzea, margotu berri dugun egongelako pareta mirestea, konpondutako motorra probatzea…), lorpen sentsazio berehalakoa ematen digute. Baina lanean egiten ditugun gauza asko kontzeptualak, transakzionalak edo komunikatiboak dira (mezu elektronikoak erantzutea, aurkezpenak egitea, bilkurak, excellak…), eta ez digute egindakoaren tamainaren arrastorik ematen. Horrela, ordu gehiago eta gehiago sartzen ditugu lorpenaren mugarriaren bila. Sarri erortzen gara zulo beltz amaigabe horretan.

Nola neurtu norbere ekarpena...

Marrakexen izan nintzen oso aspaldi eta bertako plaza nagusiko “dentistak” bere “curriculum vitaea” zeraman eskorga batean. Pazienteei/bezeroei kendutako hortz eta hagin guztiak bertan tontor handi ikusgarri batean zeramatzan bere iaiotasun paregabe eta ukaezinaren adierazgarri. Hori da hori lorpenak zehaztasunez adieraztea! Ezin leporatu behintzat marketin engainagarria egiten zuenik. Egiaztagiri beharrik ez zuen.

Nire kontsultan batek baino gehiagok behar izaten du -bikotekidearekin dena ondo dagoela ziurtatzeko asmoz-, sexu harremanak «checklist» mentalean izatea, zertarako eta ixa egin ahal izateko, sexua hagin sinboliko bihurtuz.

Bikotekidea gaixo baldin badago, menopausia garai zailean, dolu potolo bat egiten edo bulegoan infinitu ordu sartzeagatik leher eginda (sexu harremanak zerrendako azken txokoan utziz), kezkak areagotu egin daitezke, noski. Topaketa erotikoen asuntoan -gaizki jarritako tanpoia baino deserosoagoa bihur ez dadin-, espontaneotasuna ikasi egin daiteke, arreta jarriz gero. Horretan laguntzen dut nik maiz.

Erotismoa ez da hagin bat. Ezin da neurtu. Giro bat da. Ihes egiten digu.

Erdibideko espazioak obserbatzea biziki maite dut. Jakinduria asko gordetzen dutelako. Etxeko portaletik atera eta zuzenean dentsitate handiko espaloira sartu aurretik den tarteko atari eremuak, hibridoa den heinean, etxeko txapinetan jaisteko aukera ematen dizu espazio publikoan egon arren.

Lanetik etxerako bideak rol aldaketa (mekaniko/guraso, idazkari/kirolari) egiten laguntzen du.

Ekaina eta iraila bezalako trantsizio hilabeteetan gure ordutegiak eguneratzen goaz eguzkiaren argitasuna eta tenperaturarekin bat egin nahian, edo.

Postreak, bazkariari amaiera emateko sentsorialki eta emozionalki prestatzen gaitu.

Igeriketako ikastaroa egiten dute batzuek, gero igeriketako ikastaroa egin ahal izateko. (Zentzua du egiten duenarentzat, e!).

Laku baten ondoan zegoen kanpin batean, alemaniar familia bat etxera itzuli aurreko gauean kanpin denda handia desmuntatzen ikusi nuen; autoan gorde eta kanpin denda txiki batean lo egin zuten, egunsentiarekin batera itzulerako bidaiari ekin ahal izateko.

Erotismoak trantsizio espazioetan sostengatua behar du izan. Aukera ugaritasun neurrigabearen aurrean, askeago sentitu ordez, gainkarga sentitzen hasiak gara, ordea.

Jertse jakin bat aukeratu eta erosteko unea (negukoa, koloretsua eta prezio jakin batekoa), kezka handiz bizi dute batzuek, jertse perfektuaren bila baitabiltza. Badakite hurrengo webgunean edo dendan antzeko bat egongo dela, merkeagoa, goxoagoa edo koloretsuagoa. Tuntuna ez sentitzeko eta ez damutzeko bilaketa, amaigabea bilakatu daiteke.

Kezka horri aurre egiteko, jertse ideala munduan zehar dagoela jakinik ere, guretzako nahikoa egokia den jertsea topatzean huraxe hartu eta harro janztera gonbidatzen zaitut. Damurik gabe. Moztu etiketa, bota itzultzea ahalbidetzen duen erosketa-tiketa, ahaztu beste aukera posible guztiak eta jantzi gogoz sortzen zaizun lehen aukeran.

Egiaztapen gose amaigabeak urritasuna sortzen du, eta insatisfazio brutala.

Erotismoa ez da ikurrina mendi tontorrean iltzatzea.

Ezta itxarongela batean ezer egin gabe lortzen den garaikurra.

Egonaldi emozional eta sentsorial jarraitu batean eraikitzen doa, denbora, artea, arreta, elkar-entzuketa, umorea, errukia eta sentimenduen konpainian. Solidaritatea eta konexioa barnebiltzen ditu. Aukeratzeko aske sentiarazten digunean, satisfaction. •