Gaur 40 urte, ‘Rainbow Warrior’ leherrarazteagatik ordaindu zuen Estatu frantsesak

Greenpeaceren ikurra badago, ‘Rainbow Warrior’ ontzia da. Lehena 1985ean hondoratu zuten Frantziako zerbitzu sekretuek, Mururoako atoloian egin nahi ziren proba nuklearren aurkako protesta geldiarazteko. Gaur 40 urte, kate-ordainak ordaindu behar izan zizkion Mitterranden Gobernuak Greenpeaceri. 

Uztailean gogorarazi genizuen legez, 1985eko uztailaren 10ean, ‘Rainbow Warrior’ Greenpeaceko itsasontzia leherrarazi zuten Frantziako zerbitzu sekretuek Zeelanda Berrian. Auckland hirian porturatua zen ontzia, frantziarrak Ozeano Barean egiten ari ziren entsegu nuklearren aurkako kanpaina betean.

Urpeko bi lehergailu jarri zizkioten eta 36 urteko Fernando Pereira argazkilaria hil zuten.

Auzia nazioarteko eskandalu bilakatu zen, Charles Hernuren aginduz eta François Mitterranden oniritziarekin, Gobernua tarteko zela jakin zenean.

NBEk Greenpeace-i konpentsazio ekonomiko bat ordaintzeko agindu zion Frantziako Estatuari, eta horrekin bigarren ‘Rainbow Warrior’ bat uretaratu ahal izan zuen 1989an. Hori bai, ordaindu egin zute, baina Zeelanda Berriko Poliziak atxilotu zituen bi agente frantziarren patua ez zen Aucklandeko auzitegiaren sententziak finkatutakoa: Alain Mafart eta Dominque Prieur, horrela deitzen ziren, hamar urtetara zigortu zituzten terrorismoagatik.

Parisek presioa egin zuen, Zeelanda Berritik inportazioak egitea ere debekatu zuen, harik eta bere agenteek zigorra Frantzian betetzea lortu zuen arte. Hurrengo egunean aske utzi zituen.