1.100 pertsonak baino gehiagok euskal kostaldeko laginak hartzen eta laborategian aztertzen ikasiko dute ‘Kontuz! Ez nazazu zapaldu!’ programan. Urtero antolatzen duten ekimenak itsas ikerketa herritarrengana hurbildu eta bioaniztasun mikroskopikoari eta mikroplastikoek eragindako kutsadurari buruz sentsibilizatzea helburu.
Hirugarren edizioa da aurtengoa, Adi! Plentziako Itsas Estazioko diziplina anitzeko ikertzaile talde batek (PiE-UPV/EHU) bultzatuta.
STEAM proiektu bat da, ikerketa eta naturaren aurkikuntza metodo zientifikoaren bidez bateratzen dituena. «Lupa edo mikroskopioa jartzen du hondartzara goazenean zapaltzen dugun hondar horren gainean, oinpean daukagunaz jabetu gabe», adierazi dute EHUtik.
Gainera, aniztasun funtzionala duten pertsonen «ahalduntzea ere errazten duen» proiektu inklusiboa dela baloratu dute.
Parte hartuko duten taldeetako arduradunen prestakuntza-fasea amaitu ondoren, Bizkaiko eta Gipuzkoako 44 ikastetxetako eta 17 elkartetako 1.100 lagunek baino gehiagok hondar eta ur laginak hartuko dituzte euskal kostaldeko hainbat hondartzatan maiatza bitartean.
Ondoren, beren ikastetxeetako laborategietan edo Plentziako Itsas Geltokiko instalazioetan aztertuko dituzte.
Steam zigilua
‘Kontuz! Ez nazazu zapaldu!’ programa 2022. urtetik garatzen da, Zientzia, Berrikuntza eta Unibertsitate Ministerioko Zientzia eta Teknologiarako Espainiako Fundazioaren (Fecyt) laguntzarekin eta EHUko Ikerketaren Gizarte Hedapenerako Zuzendaritzaren, PiE-UPV/EHUren eta zientzia-taldearekin lotutako ikerketa-taldeen laguntzarekin.
Nabarmendu dutenez, proiektuaren jarraipena «datorren ikasturterako ere bermatuta dago», eta aurtengo berrikuntzen artean, ‘STEAM zigilua’ duen proiektuak hautatutako euskal hondartzetan dauden bakterio-komunitateak deskribatuko ditu, ikerketaren irismena zabalduz.
Ekainaren 9a
Proiektuaren emaitzak Ozeanoen Munduko Egunean partekatuko dira, ekainaren 9an, Bilboko Bizkaia Aretoan parte hartuko duten zentro eta elkarte guztiak bilduko diren ekitaldi batean. Bertan, lan onenen eta «aparteko inplikazioa» duten taldeen sariak banatuko dira.
Zinema dokumentaleko saio bat egongo da, eta nazioarte mailan ospea duten ikertzaileek emandako dibulgazio-hitzaldiak eta proiektuan parte hartu duten erakunde inklusiboak ikusarazteko tailerrak eskainiko dira.
Egun horretatik aurrera, ekainaren 17ra arte, Bizkaia Aretoko Axular eta Chillida aretoetan, talde parte-hartzaileek egindako poster zientifikoak erakutsiko dira, mikrobioaniztasunari eta kutsadurari buruzko aurkikuntzak erakusteko. Azpimarratu dutenez, erakusketa inklusiboa eta publikoari irekia da.
