Argazkia Puntu Eus Euskal Herriko argazki topaketaren antolatzaileek aurtengo edizioko zortzi irabazleen izenak jakinarazi dituzte. Topaketaren bigarren edizioa maiatzaren 10ean izango da, Aretxabaletan.

Aurten, 2024an bezala, irabazle gisa hautatutako zortzi proiektuek «argazkiz erretratatzen dituzte» Aretxabaletako eta Euskal Herriko herrialde ezberdinen «interesak eta desirak».

Aretxabaletako argazkilari irabazlea Jon Ander Alberdi izan da, eta herri honetako baserri abandonatuak erretratatu ditu. Baserri horien hondakinek aurreko mendera arte bertan bizi izan ziren nekazari, artzain eta errotarien oroimena gordetzen dute. «Proiektu honek historikoki Aretxabaletako biztanleen bizileku eta euskarri izan diren paisaiaren erabileren aztarnak islatzen ditu», azaldu dute antolatzaileek.

Telmo Sanchez Ugalde hautatu dute aitona zuen osaba Sebastian Pirinioetako mendi espedizio batean hildako Goierriko alpinistari omenaldia egiteko proiektuarekin.

Azaldu dutenez, memoria lan bat da familiako artxiboko argazkiekin egina, euskal espediziokide hau hazi eta bizi izan zen Goierriko paisaiaren nortasunari eta irudikapen bisualari buruzko esplorazio zabalago bat bihurtua. «Gizakiaren eta paisaiaren arteko loturari buruz hausnartzen duen proiektua» da, «gure nortasun sakonenaren irudikapen bisual eta emozional gisa», adierazi dute.

Leonor Uriarte izango da Arabaren ordezkaria aurtengo edizioan, herrialde horretan eta Bizkaian egindako proiektu batekin. Autobusetik egindako paisaiaren argazkiek osatzen dute lana.

Bi urtez, goizeko lehen orduan eta eguna amaitzean, egileak autobus hori hartu zuen bi herrialdeen arteko bidaia egiteko, eta kristalen atzetik «normaltasunaren eta kontzientzia-egoeraren pitzadurari argazkia ateratzen zion, egoera kaltegarri eta prekarioen antzekotasuna bilatuz».

Iñaki Izquierdo Muxika Bizkaiko irabazleak bere jaioterria, Sestao, erretratatu eta Ezkerraldeko paisaia industrialaren galera erakusten du.

Ainhoa Tejerinak, bestalde, Nafarroako Zubieta, Lesaka, Lantz, Unanu, Altsasu eta Erriberriko landa inauterien azterketa bisuala egin du.

Donibane Lohizuneko portua

Lapurdiko proiektu irabazlea Severine Dabadie argazkilariari dagokio. Donibane Lohizuneko portuko azken atunontziaren azken bidaiak erretratatu ditu. Nafarroa Beheretik dator Camille Chopin argazkilariaren proiektu irabazlea, ‘queer’ nortasuna euskal landa-inguruneetan erretratatu duena.

Azkenik, Eliane Heguiaphal argazkilariaren Zuberoako argazki-proiektu irabazleak artzain zahar baten bizitza erretratatzen du, Lakarri-Arhane haraneko ‘Bosmendiak’ izeneko eremuan bere ardiak zaintzen bizitza osoa eman zuena.

Zortzi argazkilarien proiektuak maiatzaren 10ean aurkeztuko dituzte Aretxabaletako Arkupe Kultur Etxeko entzuleen aurrean.

Ondoren, zortzi proiektuek osatutako erakusketa kolektibo bat inauguratuko dute. Bisitaldi gidatua erakusketaren komisario Gustavo Bravo argazkilariak egingo du, eta zortzi egileak bertan izango dira. Proiektu irabazleak ikusgai daude Argazkia Puntu Eus-en webgunean.