Barakaldoko Emantzipazio Eskolak 18 eta 35 urte bitarteko gazteentzako doako jarduera berriak eskainiko ditu. Asteazkenean, maiatzaren 7an, hasiko dira eta ekainaren 28ra arte eskainiko dituzte. Saio horietan, besteak beste, etxebizitzaren alokairua eta erosketa, aseguruak, sukaldaritza, joskera eta osasuna izango dituzte hizpide.
Eskola, gazteen ekimenez abian jarria, GAZ programazioaren parte da. Barakaldokoa emantzipazio prozesua babesten duen zerbitzu honek Bizkaian duen bigarren bulegoa.
Gazteei «tresnak ematea» da Emantzipazio Eskolaren helburua, «helduaroan modu autonomoan eta arduratsuan moldatzeko funtsezko gaitasun praktikoak eskura ditzaten, administrazio eta finantza kudeaketa, osasunaren eta etxearen zaintza edo elikadura bezalako funtsezko arloak jorratuz».
Programazio berria Errenta aitorpenari buruzko hitzaldi batekin hasiko da maiatzaren 7an, aditu baten eskutik. Parte-hartzaileek zuzenean kontsultatu ahal izango dituzte zalantzak.
Bestalde, maiatzaren 14rako etxebizitza alokatzeari eta erosteari buruzko hitzaldi bat antolatu da, online egingo dena. Bertan, «Emantzipa eta Gaztelagun laguntzei buruz hitz egiteko eta GAZ espazio birtuala sustatzeko» aprobetxatuko da, aurreratu du Udalak.
Gainera, hainbat asegururen harpidetzari buruzko hitzaldi bat egingo da ekainaren 10ean, eta beste bat «publizitatea eta gorputza gurtzea» gaiari buruzkoa ekainaren 17an, Kontsumobideko langile espezialisten laguntzarekin.
Autozainketari, osasun fisiko eta mentalari dagokionez, aromaterapia-tailer bat eskainiko da maiatzaren 21ean, eta pomadak egiteko beste tailer bat maiatzaren 28an.
Programazioari amaiera emateko, oinarrizko sukaldaritzari buruzko ikastaro bat egingo da, menu «nutritibo eta errazekin» ekaineko asteazkenetan, eta «joskera errazeko» tailer bat ekainaren 7, 21 eta 28an, larunbatetan.
Jarduera horietan parte hartzeko, aldez aurretik izena eman beharko da, ostiral honetan bertan, San Juan kaleko 17ko Gazte Bulegoan, WhatsApp bidez (688 639 935) edo posta elektronikoz (gaztebulegoa@barakaldo.eus).
