‘Martiodako ostegunak’ izenburupean, biodibertsitateari eta naturari buruzko hitzaldi zikloa antolatu du Arabako Foru Aldundiak, haren 50. urteurrenarekin bat eginez. Hitzaldi guztiak Gasteizko Ignacio Aldecoa Kultur Etxean izango dira.

Lehenengo hitzordua azaroaren 6an izango da, Jonathan Rubines biologo eta dibulgatzailearen eskutik. ‘Naturaren sare ikusezina’ izenburupean, fauna espezieen arteko harreman ekologikoei buruz hitz egingo du adituak, eta harreman horiek kontserbatu ahal izateko ulertzeak duen garrantziaz arituko da.

Azaroaren 13an, Joseba Carreras de Bergaretxe izango da hizlaria, 1999tik 2025era Martioda Berreskuratzeko Zentroaren arduraduna izan zena. Hizlariak gune honen historia kontatuko du, boluntarioek kudeatzen zutenetik, gaur egunera arte.

Hirugarren ostegunean, hilaren 20an, hegaztien migrazioa izango da hizpide. Juan Arizagak, Biologian doktore eta Aranzadi Zientzia Elkarteko Ornitologia Saileko zuzendariak, hegaztiak urteroko bidaia honetarako nola prestatzen diren eta bidaia horiek ikuspegi global zein lokaletik ezagutzeko zer tresna erabiltzen diren azalduko du.

Programazioari amaiera emango dio Elvia Gómez Troya 13 urteko arakatzaile eta naturistak, zeinak Scientific Exploration Society (SES) erakundearen nazioarteko aintzatespen ospetsuenetako bat jaso berri duen. Azaroaren 27an egingo den ‘Naturaren ahotsak’ izeneko hitzaldian, naturak berarentzat dituen soinuen esanahiaz eta naturarekin konektatzeko moduaz hitz egingo da.

Martiodan, sendatze prozesuan dauden animalia basati zaurituak edo ahulduak daude, errehabilitazioaren ondoren, indarrak hartu eta naturara itzultzeko moduan egon arte.

20.000 animalia baino gehiago

Martiodako fauna berreskuratzeko zentroak 20.000 animalia baino gehiago bildu ditu mende erdian. 1975ean hasitako proiektu hau aitzindaria izan zen Estatu espainolean eta hasierako urteetan Penintsula osotik zetozen animaliak jasotzen zituen.

Bere lan klinikoaz eta errehabilitazioaz gain, Arabako faunaren kudeaketan laguntzeko zentro gisa funtzionatzen du. Espezieak kontserbatzeko ikerketa eta jarraipen proiektuetan laguntzen du, nekropsiak egiten ditu animalien heriotza kausak identifikatzeko eta afekzioak edo mehatxuak prebenitzeko, eta ingurumen delituak ikertzen laguntzen du.

Bestalde, haien lana funtsezkoa da basafaunatik etxeko abereei edo pertsonei transmititu dakizkien gaixotasunak edo infekzioak detektatzeko. Era berean, aktiboki inplikatzen da espezie exotiko inbaditzaileen kontrolean, gure ekosistemak babesten laguntzeko.

Hasiera batean zentroa bisitetara irekita bazegoen ere, gaur egun hori ezinezkoa da errekuperatzen ari diren animaliei estres gehigarria saihesteko eta haien segurtasuna bermatzeko.

Gaur egun, ingurumen hezkuntzako jarduerak egiten ditu ikastetxeetan eta elkarteetan, zentroaren eginkizunak ezagutarazteko, naturarekiko errespetua eta jardunbide egokiak sustatzeko eta gizakien eta animalien arteko bizikidetza hobetzeko.