1977ko maiatzaren 13an, Jose Luis Cano Perez 28 urteko errenteriarra hil zuen Polizia espainolak Iruñean. Amnistiaren Aldeko Bigarren Astearen barruan, greba orokorra egin zen egun hartan; mobilizazio sozial izugarria eta Polizia espainolaren errepresio bereziki bortitza bizi ziren garaian. Alde Zaharra astintzen zuten karga polizialen erdian, Jose Luisek Caldereria kaleko 42. zenbakian dagoen Manuel tabernan bilatu zuen babesa. Hala ere, Poliziako kideak establezimenduan sartu ziren eta indarrez ateratzera behartu zuten. Behin kanpoan, poliziek jipoitu egin zuten eta haietako batek tiro bat eman zion garondoan. Berehala hil zen. Heriotzak haserre-oldea piztu zuen eta protesta jendetsuak egin ziren Euskal Herri osoan, baita Iruñeko Arrotxapea auzoan ere, herritarrek errepresioari aurre egin baitzioten poliziaren basakeria salatzeko. Hileta-elizkizuna Iruñeko hilerrian egin zen, eta ekitaldi jendetsua izan zen, milaka pertsona bildu zituena. Iruñeko protesta manifestazioen eta Jose Luis Cano Perezen ehorzketaren argazkiak garai hartan “Egin” egunkariko argazkilaria zen Josetxo Zaldua Lasak (1951-2021) egin zituen. Elizondoarraren lan dokumentala egun haietako lekukotasun bisual paregabea da.