21 DéC. 2025 - 05:00h Duela 55 urte bere buruaz beste egin zuen Antonio Goñi Igoak Antonio Goñi Igoa (1931-1970) nafarrak bere buruaz beste egin zuen gaur 55 urte Martuteneko espetxetik atera ondoren. Espainiako poliziak 18 egun inkomunikatuta eduki zuen eta han jasandako torturek txikitu zuen gaztea. Ezin izan zuen atxiloketan bizi izandakoa gainditu. Goñi eta Zabalzaren argazkiak, 2021an egin zitzaien omenaldi batean. (Idoia ZABALETA | FOKU) Gaur 8 Burgosko Prozesuak eta Euskal Herrian horren aurka egin ziren mobilizazioek markatu zuten 1970. urtearen amaiera: ekainaren erdialdean, Jose Miguel Andueza beratarraren heriotza izan zen, ‘Infernua’ izenez ezagutzen den Donostia inguruan izandako trafiko istripu batean; eta abenduan, beste bi hildako izan ziren, bat Roberto Perez Jauregi gaztea, Eibarren, manifestazio batean, poliziak tiroz hil zuena, eta bestea Antonio Goñi Igoa (Etxarri Aranatz, 1931-Donostia, 1970eko abenduaren 21a) langile nafarra. Etxarrikoa zen, baina Donostian bizi zen Antonio Goñi. Valverde inprimategiko langilea zen. Ez dago oso garbi zergaitik atxilotu zuten, baina, antza, ‘Gora Euskadi askatuta!’ oihukatu zuelako izan zitekeen. Hainbat egunez torturatu ondoren, askatu egin zuten, familiak lankideen laguntzaren 20.000 pezeta ordaindu ondoren. San Tomas egunean, abenduaren 21ean, Goñi ez zen bere kuadrillarekin jarrita zuen hitzordura agertu. «Txakur hauek hil naute», idatzitako ohar bat utzi zion emazteari eta, ondoren, bere buruaz beste egin zuen. Urte berean hildakoekin gertatu ez den bezala, Antonio Goñiri ez dio Lakuako Gobernuak Segurtasun Indarrek eragindako «motibazio politikoaren biktima» eta «bidegabeko sufrimendua» aitortu.