Duela urte batzuk, Baionako “Enbata” aldizkariaren argazki-fondoen berrikuspen batean, garai hartako dokumentu grafiko ugariren artean, Eduardo Moreno Bergaretxe, Pertur, ETApm-ko kidearen argazki txiki bat aurkitu nuen. Balio historiko nabarmeneko irudia zen, eta arreta ematen zuen moldaketa berezi bat zeukalako. Bere ohiko aurpegiaren gainean, bizar bat marraztuta ageri zen, une horretan bere fisionomia nolakoa izango zen simulatzen zuen eskuz egindako trazuak erantsiz. Aldatutako irudi hura ez zen artxiboko kuriositate soila, 1976ko uztailaren 23an desagertu ondoren Ipar Euskal Herrian argitaratutako hainbat argitalpenetan modu aktiboan erabili zen, horien artean modu herrikoian argitaratzen zen “Askatasuna” aldizkarian. Ukituen egilea ezezaguna da oraindik, baina badirudi urte haietan ateratako jatorrizko argazkia Josean Mujika Arregi errefuxiatuak egin zuela.