1995ean Euskaltel sortu zen, Lakuako Gobernua eta BBK, Kutxa eta Vital aurrezki-kutxak parte zuten erakunde gisa. Telefonia finkoaz harago, telekomunikazio-sare oraindik hasiberria garatzeko jarri zen martxan, mugikorra, internet eta kable bidezko telebista hedatuz.

Jatorri publikoko proiektu estrategikoa behar zuena izan, denborarekin inbertitzaile pribatuei zabaldu zitzaien eta, mugimendu anitzen ostean, esku pribatuetan gelditu zen. 

2021eko abuztuak 5ean CNMVk (Balore Merkatuaren Espainiako Batzordeak) iragarri zuen MasMovil enpresak Euskaltel bereganatu zuela 2.000 milioi euroren truke bere EEPa itxi zuenean, konpainiaren akzioen %98rekin. Operazioak milioi-zaparrada utzi zuen akziodunen artean.

Egun hartako GARAren editorialean gogoratzen zen bezala, operazioa bereziki arrakastatsua izan zen Kutxabankeko zuzendari nagusientzat, 27 milioi euro inguru banatuko baitziren hobarian.

Baina Euskal Herriarentzat «galera estrategikoa» zen, «ez baitu soilik kontrol publikoa galtzen, erabakigunea ere galtzen baitu». Horrez gain, «duela bederatzi urte Lakuako Gobernuak Euskalteli prezio barregarrian saldu zion zuntz optikoaren sare publikoa», eta, beraz, «herrialdearentzat galera nabaria da».

1998. urteaz geroztik Euskaltel-Euskadi txirrindularitza taldearen babeslea zen. Horrela, Euskadi taldeak elastikoan zeukan kolore urdina, Euskaltelen kolore laranjagatik ordezkatu zen. Urte askoz, Tourreko Pirinioetako etapetan Euskaltelen kamisetak gehiengoak ziren errepide bazterretan.

2022ko uztailean, MasMovilek eta Orangek bat egin zuten MasOrangen; eta 2025ean, Estatu frantseseko multinazionalak MásOrange osoa bereganatu zuen, 4.300 milioiren truke KKR, Providence eta Cinven funtsek zuten konpainiaren beste erdia erostean, euskal inbertitzaile talde batekin batera.