«Musika eta emozioak ardatz» hartuta, diskoak, liburuak, bildumagileentzako artikuluak, solasaldiak eta kontzertuak biltzen dituen Bunker azokaren laugarren edizioa urriaren 23tik 25era egingo da Barakaldoko Herriko plazan jarriko den karpan. Ekitaldia doakoa da eta Hiriko Soinu proiektuaren barruan sustatu du Barakaldoko Udalak, BBKren eta Bizkaiko Foru Aldundiaren laguntzarekin.
Azoka artista eta idazleek musikarekin duten lotura emozionalari buruz hitz egitea du helburuetako bat, eta artista horietako bat Miqui Puig izango da, abeslari, ekoizle, irrati esatari eta DJa. Diskoak grabatu ditu (lehenengo Los Sencillos taldearekin eta gero bakarka), irratsaioak irudikatu ditu, telebistan aritu da eta «pop abesti ahaztezinak» sortu ditu. ‘Yo no quería ser Miqui Puig’ bere lehen liburua da, bere egunkari pertsonaletan oinarritua.
Bestalde, Pablo Salgado Mendez Banizu Nizuke argitaletxeko editoreak proiektu honi buruz berba egingo du. Banizu Nizukek Portugaleten du egoitza eta zirkuitu komertzialetik edota katalogoz kanpo dagoen euskal literatur ondarearen kontserbazioan eta argitalpenean lan egiten du.
Gainera, ‘Esto no acaba... hasta que Fatboy cante’ aurkeztuko du, Banizu Nizukek argitaratutako liburua, Fatboy Slim izen artistikoagatik ezaguna den Norman Cook musikari ingelesaren 40 urteko ibilbidea jasotzen duena.
Halaber, The Baboon Show, Toundra, Viva Belgrado eta Nuevo Catecismo Catolico taldeetako ‘MondoSonoro’ aldizkariaren Euskal Herria eta Errioxako edizioaren zuzendari Iker Barbararekin solasean ariko dira asteburu horretan bertan Hiriko Soinuak festibalean emango dituzten kontzertuen aurretik.
Oholtza gainean
Gainera, Bunker azokak kontzertuak ere eskainiko ditu: Arnau Coderch katalanak (Arnau And The Honky Tonk Losers country taldeko liderra) eta Gasteizen bizi den Matthew Cartmill amerikarrak osatutako bikotea eta Manuel Serrano musikari andaluziarraren Wraaang! bakarkako proiektua.
Egitaraua osatzeko, Paule Bilbao arte terapian espezializatutako psikologo eta Arima taldeko konpositore eta abeslariak tailerra emango die Barakaldoko Lanbide Heziketako ikasleei, eta bukatzean, Hiriko Soinuak jaialdiko barrutitik bisita pribatua egingo dute.
Bunker azokako standen artean, Long Play (Barakaldo), Chicxs de la calle, EM Zirrimarra (Bergara), Munsterama (Santurtzi), Pute-Arte (Bilbo), Re-Loop Shop (Logroño) eta Vinylora (Gasteiz) disko, arropa eta merchandising dendak egongo dira. Halaber, Iruñeko Katakrak liburu denda eta argitaletxea, eta zinema, telesail, komiki eta mangaren inguruko bildumagile artikuluak saltzen dituen Barakaldoko Mano del Friki denda ere bertan izango dira.
